𝐒𝐞𝐤𝐫𝐞𝐭á𝐫𝐢𝐮 𝐄𝐬𝐭𝐚𝐝𝐮 𝐀𝐬𝐮𝐧𝐭𝐮 𝐓𝐨𝐩𝐨𝐧í𝐦𝐢𝐚 𝐧𝐨 𝐎𝐫𝐠𝐚𝐧𝐢𝐳𝐚𝐬𝐚𝐮𝐧 𝐔𝐫𝐛𝐚𝐧𝐚 (𝐒𝐄𝐀𝐓𝐎𝐔), 𝐆𝐞𝐫𝐦𝐚𝐧𝐨 𝐒𝐚𝐧𝐭𝐚 𝐁𝐫𝐢𝐭𝐞𝐬 𝐃𝐢𝐚𝐬, ohin, halo intervensaun hodi hapara konstrusaun ofisina andar ida ne’ebé kontinua halo servisu maske hetan ona xamada dala-tolu atu la bele konstrui tan uma ka infraestrutura refere, iha aldeia Rai Nain, Suku Colmera, Postu Vera Cruz, Munisípiu Díli.

Razaun hapara, tanba Konstrusaun foun bo’ot ne’ebé harii iha área urbana la halo planu jestaun tráfiku ho di'ak atu define fatin entrada/saída, inklui la iha fatin parajen/parking area ne'ebé adekuadu ba kompañia nia kareta, funsionáriu no vizitante sira.

SEATOU konsidera, konstrusaun foun iha área ida ne'ebé agora dadaun iha ona engarrafamentu (trafiku) bele hamosu problema bo’ot liu tan, hanesan cruzamentu Mandarin nu’udar sentru sidade nian ne’ebé liga dalan protokolu halo karreta no motor akumula iha oras dadeer ema hotu ba servisu/eskola, meudia deskansa, no lorkraik fila hotu hamutuk iha tempu hanesan.

Aleinde ne’e, tuir planu estrada hosi diresaun Igreja Katedral to’o Mandarin sei kontinua prosesu ba alargamentu estrada iha tempu badak, tinan ne’e.