AILEU, 10 Abril 2026: 𝐒𝐞𝐤𝐫𝐞𝐭á𝐫𝐢𝐮 𝐄𝐬𝐭𝐚𝐝𝐮 𝐀𝐬𝐮𝐧𝐭𝐮 𝐓𝐨𝐩𝐨𝐧í𝐦𝐢𝐚 𝐧𝐨 𝐎𝐫𝐠𝐚𝐧𝐢𝐳𝐚𝐬𝐚𝐮𝐧 𝐔𝐫𝐛𝐚𝐧𝐚 (𝐒𝐄𝐀𝐓𝐎𝐔), 𝐆𝐞𝐫𝐦𝐚𝐧𝐨 𝐒𝐚𝐧𝐭𝐚 𝐁𝐫𝐢𝐭𝐞𝐬 𝐃𝐢𝐚𝐬, Sexta-feira, sai hanesan orador ba forum, “Hamutuk iha Vizaun ba Objetivu Komun no Reforsa Kolaborasaun entre Aileu-Anan ba Poder Lokal”. Atividade ne’e halao iha salaun Timor Klaran – Aileu.

Objetivu hosi sorumutuk ne’e rasik, hodi Reforsa kolaborasaun servisu, komunikasaun no partisipasaun efetivu hosi Aileu oan hotu-hotu iha preparasaun ba desentralizasaun no poder lokal iha Autoridade Munisípiu Aileu.

Sekretáriu Estadu Asuntu Toponímia no Organizasaun Urbana (SEATOU), hetan konvite hosi Autoridade Munisípiu Aileu hanesan Orador ho tema: Estratéjia ba Implementasaun Poder Lokal: Vizaun Polítika IX Governu Konstitusionál, hamutuk ho orador sira seluk hanesan: Pe. Frei Carlito da Silva, Ocarm, Phd, Sr. Abilio de Araujo, Sra. Beatriz de Deus Torrezão. M. PD, Atividade ne’e modera hosi Sra. Epi Orleães.

Prezensa SEATOU iha IX Governu Konstituisional maka atu hadi’a ka re-organiza sidade hotu-hotu iha teritorio Timor Leste. Hanesan orador ba ohin loron, hau atu fo hanoin hikas ba ita hotu sobre politika no programa nuno governu nomos orientasaun servisu ne’ebé prezisa alkansa iha tinan ida ne’e, liliu ligado ho servisu sira iha Ministeriu Administrasaun Estatal.

SEATOU hateten, IX Governu konstitusionál komprometidu atu hakbesik servisu públiku ba povu, liuhosi desentralizasaun administrativa territorial (poder local), la’os de’it transferénsia kna’ar, maibe transferénsia poder tomak atu munisípiu bele deside rasik tuir prioridade lokal.

Atividade ne’e partisipa hosi Sekretáriu Estadu ba Formasaun Profisionál no Empregu, Rogério Araújo Mendonça L.Ed, Veteranus, Grupu Intelektual, Partidu Politiku, Organizasaun Sosiedade Sivil, Organizasaun Feto, Organizasaun ema ho difisiénsia, Lider Komunitaria, Setor Privadu no komunidade sira.