Dili, 13 Abríl 2026 – Ministru Agrikultura, Pekuária, Peskas no Florestas (MAPPF) ho Ministru Administrasaun Estatal (MAE) realiza enkontru ho Prezidente Autoridade Munisípiu sira atu servisu hamutuk hodi rekolla dadúz produsaun ai-han ne’ebé agrikultór sira prodúz iha rai laran atu nune’e bele relata bá Primeiru Ministru iha enkontru Konsellu Ministru kuarta semana ne’e.

Relasiona ho problema funu iha mediu oriente ne’ebé sei fó impaktu bá folin konvustivel no folin foos iha mundu inklui Timor-Leste. Ministru Agrikultura, Pekuária, Peskas no Florestas (MAPPF) ho Ministru Administrasaun Estatal (MAE) hasoru malu ho Prezidente Autoridade Munisípiu sira hodi husu disponiblidade autoridade sira nian atu rekolla dadúz ai-han foos no batar ne’ebé agrikultór sira prodúz iha rai laran.

“Ha’u husu ita hotu atu servisu hamutuk. PAM sira bele orienta extensionista sira atu fornese dadús produsaun ai-han hare no batar ho lolos, atu ita bele hatene ho lolos produsaun haree no batar kada tinan. Hodi nune’e ita bele responde bá merakdu ho estandarizasaun presu ne’ebé di’ak”. Dehan Ministru Marcos bainhira hamutuk ho Ministru Administrasaun Estatal (MAE), Tomas do Rosario Cabral enkontru ho PAM sira iha salaun enkontru MAE Colmera Segunda ne’e.

Ministru Marcos husu bá PAM sira atu servisu hamutuk ho extensionista sira iha kada suku iha postu administrativu sira iha Munisípiu ida-idak atu nune’e bele fornese dadúz ho akuradu no loloos kona-bá produsaun hare no batar ne’ebé Munisípiu sira prodúz. Tanba dadúz sira ne’e mak sei relata bá PM no sei ajuda Governu atu hatuur estandarizasaun presu foos ho loloos

Enkopntru ida ne’e nu’udar kontinuasaun ne’ebé antes ne’e Ministru Agrikultura, Pekuária, Peskas no Florestas, realiza ona ho Ministru Comércio Indústria, no Centro Lojistika Nasionál (CLN) iha salaun enkontru uma adat MAPPF Comoro semana kotuk.