𝗗Í𝗟𝗜, 𝗠𝗝 — 𝗧𝗲𝗿𝘀𝗮-𝗳𝗲𝗶𝗿𝗮 𝟭𝟰 𝗔𝗯𝗿𝗶𝗹 𝟮𝟬𝟮𝟲, Sua-Eselénsia Ministru Justisa, Dr. Sérgio de Jesus Fernandes da Costa Hornai ofisiálmente asina ona kontratu ho kompañia PT. BIRO ARSITECK, hodi hahu dezeñu tékniku no arquitetóniku ba konstrusaun Prizaun Novu ho Sentru Produsaun iha Weberek, Munisípiu Manufahi.

Serimónia asina kontratu kona-bá dezeñu tékniku ba konstrusaun Prizaun Novu ho Sentru Produsaun iha Weberek, realiza iha sala Gabinete Ministru Justisa, Díli. Ho komitmentu Governu liuhosi Ministru Justisa hodi kontinua hadi’a infraestrutura setor justisa no korresional ninian.

Ministru Justisa, Dr. Sérgio Hornai hateten, projetu ida-ne’e importante tebes ba dezenvolvimentu infraestrutura iha setor justisa. Ho objetivu atu moderniza sistema koresional, garante seguransa, dignidade humana, no hametin reabilitasaun prizioneiru sira. konstrusaun Prizaun Novu ho Sentru Produsaun Weberek ne'e, la’ós de’it ba akomodasaun prizioneiru, maibé mós sei integra programa formasaun profisionál, atividade produtiva, no reabilitasaun sosial hodi fasilita reintegrasaun ba sosiadade.

Kontratu ne’e preve prosesu dezeñu durante fulan-6, hafoin submete ba avaliasaun no aprovasaun Ministériu Justisa nian. Depois, dokumentu sira sei kontinua ba Komisaun Nasional Aprovizionamentu no mós fiskalizasaun prévia hosi Kámara das Kontas. Projetu ida-ne’e, ho montante osan USD 196.999, 20, ne’ebé sei trata tuir faze planeamentu, aprovasaun, implementasaun no monitorizasaun, hodi asegura transparénsia no Boa Governasaun.

Konstrusaun Prizaun Novu ho Sentru Produsaun iha Weberek, ho terenu hektare 80 resin, sei transforma sai modelu sentru reabilitasaun no produtivu, ne’ebé promove formasaun, kualifikasaun, no reintegrasaun sosial prizioneiru sira. Projetu ida ne’e reflete vizaun Governu atu hametin sistema justisa ne’ebé humanizadu, efisiente, no orienta ba reabilitasaun no reinserasaun sosial.

# 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 #