MALIANA, 13 Abril 2026 — Ministériu Agrikultura, Pekuária, Peska no Floresta (MAPPF), liu hosi Diresaun Nasionál Estensaun no Formasaun Agríkola (DNEFA), lansa tan Formasaun Profisionál Agríkola Fase daruak ba joven sira iha tinan 2026. Atividade ne’e realiza iha Sentru Formasaun Profisionál Agríkola (CFPA) Corluli, Maliana Munisípiu Bobonaro.

Diretór Jerál Agrikultura, Kafé no Plantas Industriais, ne’ebé reprezenta Ministru MAPPF, enkoraja formandu sira atu uza oportunidade ne’e ho seriedade. “Koñesimentu no abilidade ne’ebé imi simu sei sai baze importante atu dezenvolve setór agríkultura iha futuru".

Programa ne’e nu’udar kontinuidade hosi esforsu Governu nian atu hasa’e kapasidade tékniku no prátika ba formandu sira Iha fase ida-ne’e, ema na’in- 29 sei partisipa iha treinamentu intensivu ne’ebé kobre área estratéjiku sira hanesan tékniku kultivasaun, jestaun agríkola, pekuária, no inovasaun iha produsaun ai-han.

Iha Fatin hanesan Diretór Nasional Extensaun no Formasaun Agrikola iha nia intervensaun hatutan, formasaun ne’ebé sei hala’o durante fulan neen (6) ne’e sei foka liu ba kestaun prátika. Ho kompozisaun 25% de’it ba teoria no 75% foka ba prátika iha terrenu, ida-ne’e atu garante katak formandu sira bele aplika kedas sira-nia siénsia iha komunidade nia le'et laran.

Ho programa ne’e, Governu hein katak bele kria rekursu umanu ne’ebé kompetente hodi kontribui ba seguransa alimentár, hamosu oportunidade servisu foun ba juventude iha área rurál, no dezenvolve agrikultura hahú hosi suku no aldeia sira.

Iha serimónia abertura ne’e entrega mós atributu no ekipamentu agríkola sira ba formandu sira. Serimonia ne’e partisipa mós hosi reprezentante PAM Sekretariadu Ezekutivu Asuntu Sosiál, Eskola Tékniku Agrícola (ETA) Moleana, SEFOPE, INDIMO, no mós Komandante Eskuadra PNTL Maliana.