𝟏𝟒 𝐀𝐛𝐫𝐢𝐥 𝟐𝟎𝟐𝟔

===========

Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, hala’o sorumutu ho Embaixadór Uniaun Europeia (UE), Sr. Thorsten Bargfrede, akompañadu husi Sr. Seth Van Doorn, hodi troka hanoin sira kona-bá área kooperasaun estratéjika sira entre Timor-Leste no UE.

Iha enkontru ne’e, Embaixadór UE hato’o interese atu kontinua reforsa apoiu ba dezenvolvimentu setór privadu iha Timor-Leste, liuhusi programa sira ne’ebé daudaun implementa hela no inisiativa sira iha futuru. Diskusaun ne’e mós foka ba prosesu integrasaun Timor-Leste ba ASEAN no oinsá UE bele kontribui atu fasilita prosesu refere.

Vise-PM ho Embaixadór UE mós diskute kona-bá asesu Timor-Leste ba Akordu Parseria Ekonómika (EPA) ho Uniaun Europeia, inklui etapa no mekanizmu sira ne’ebé presiza prepara hodi asegura benefísiu máximu ba ekonomia nasionál.

Iha enkontru ne’e, Embaixadór UE sujere katak Governu Timor-Leste bele aproveita oportunidade sira atu servisu hamutuk ho programa UE-ASEAN, hodi bele hetan apoiu tékniku no partilla esperiénsia sira husi parseiru nasaun seluk.

Alende ne’e, diskute mós estratéjia sira atu hasa’e númeru esportasaun Timor-Leste nian ba merkadu europeu. Governu daudaun ne’e foka ba dezenvolvimentu no promosaun produtu lokál potensiál hanesan nú, baunilla no kakau atu bele aumenta valór esportasaun.