𝐃𝐢𝐥𝐢, 𝟏𝟒 𝐀𝐛𝐫𝐢𝐥 𝟐𝟎𝟐𝟔-Ministériu Komérsiu no Indústria (MCI), Ministériu Agrikultura, Pekuária, Peska no Floresta (MAPPF) no Sentru Logístika Nasionál (CLN), ne’ebé tutela iha Ministru Koordenadór Asuntu Ekonomia, realiza reuniaun da-ruak liña koordenasaun ho objetivu atu aprezenta no atualiza dadus kona-ba folin sasan báziku iha merkadu rai laran, inklui kondisaun stock no fornesimentu ba sasan esensiál sira, atu asegura estabilidade oferta ba fulan hirak tuir mai.

Reuniaun ne’e fó oportunidade ba instituisaun sira atu fahe informasaun atual relasiona ho situasaun fornesimentu, distribuisaun no variáasaun folin sasan báziku, nune’e bele asegura estabilidade merkadu no fasilita desizaun husi Governu atu responde ba medida apropriadu ba nesesidade públiku.

Medida hirak ne’e mós antisipadamente responde ba posibilidade impaktu husi situasaun funu iha Médio Oriente ne’ebé bele dura tempu naruk.Hafoin aprezentasaun dadus no halo diskusaun, ikus mai hamosu konkordánsia atu hadia no atualiza hikas dadus sira ne’e, hodi kompila hamutuk sai baze ida de’it.

Dadus ne’e sei akumula no integra husi Ministériu tolu atu sai hanesan referénsia únika ne’ebé Governu bele uza hodi foti medidas apropriadu relasiona ho situasaun ne’e, liu-liu atu prepara no garante fornesimentu logistika ba tempu naruk, karik situasaun funu iha Médio Oriente seidauk remata.

Reuniaun ne’e partisipa husi Sekretáriu Estadu Floresta no Sekretáriu Estadu Pekuária, Prezidente CLN, no kargu sira hanesan Diretór Jerál, Diretór Nasionál, Xefi Departamentu, no ekipa tékniku husi MCI, MAPPF no MACAE-CLN.

𝙈é𝙙𝙞𝙖 𝙈𝘾𝙄