Dili, 14 abríl 2026 - Sua Exelénsia Ministra Edukasaun Dra.Dulce de Jesus Soares partisipa iha serimónia Asina MoU entre KOICA, WFP no Ministériu Finansas Timor-Leste iha salaun Ministériu Finansas Aitarak-Laran.

Iha diskursu Sua Exelénsia Ministra Edukasaun Dra.Dulce de Jesus Soares hatete, ohin iha ne'e atu asiste fali MoU ida tan ne'ebé sei asina entre KOICA no Ministériu Finansas ne'ebé fó benefísiu ba edukasaun no estudante sira.

" Iha fulan Marsu tinan kotuk ha’u tuir serimónia ne’ebé WFP entrega dapur eskola nian hanesan parte ida husi programa Say No to 5S, ne’ebé hetan finansiamentu husi KOICA no implementa husi WHO no WFP. Iha tempu ne'ebá, ha'u husu atu dapur furak sira-ne'e fó mós ba eskola sira seluk. Di'ak, parese katak ha'u nia orasaun sira hetan resposta tanba ohin ha'u iha ne'e iha serimónia asinatura nian atu aprova projetu ida iha ne'ebé sei fó tan dapur 30 ba ita-nia eskola sira", tenik SE. Ministra.

Governante ne'e esplika, programa ida-ne'e mós iha benefísiu potensiál adisionál balu ba estudante sira. Ida mak kona-ba formasaun ba estensionista sira. Iha kurríkulu mós iha bloku jardín eskolár iha matéria arte no kultura. Se iha estensionista barak liután ne'ebé serbisu iha ita-nia eskola sira, ida-ne'e signifika katak sira bele fó sira-nia tempu balun hodi ajuda dezenvolve ita-nia jardín eskolár sira, hanesan intensaun orijinál.

" Ami mós iha kampaña ida atu enkoraja eskola sira atu fornese variedade barak liután iha programa estrakurikulár sira ne'ebé sira oferese, nune'e apoiu ba Klube Eskolár sira Edukasaun Nutrisaun nian maka buat ida ne'ebé bele ajuda duni atu orienta ami nia estudante sira balun ba kareira sira iha futuru iha área nutrisaun nian", SE. Ministra hatutan.

Ministériu dezenvolve hela sistema EMIS foun ida no sei importante atu serbisu hamutuk hodi asegura katak plataforma ne'ebé ita-boot dezenvolve hela iha liña ho ami nia sistema. Ha’u sei husik ba WFP atu halo ligasaun ho ita-nia unidade IT atu asegura katak plataforma sira-ne’e kompativel.

Nune'e partsiipa iha serimonia importante ne'e Exelénsia, Sra. Santina J. R. F. Viegas Cardoso, Ministra Finansas Timor-Leste nian, Sra. Youn Hwa Kang, Diretora País KOICA nian iha Timor-Leste, Sra. Jacqueline de Groot, Diretora Nasaun nian, WFP no reprezentante sira husi KOICA, WFP, Ministériu Finansas no Ministériu Edukasaun.

#EliasdaCosta

#MédiaME