13 Abril 2026 Vise-Ministru Fortalesimentu Institusionál Saúde (VMFIS) Sr. José dos Reis Magno Lic.SP, MM. halo Lansamentu ba Sentru Kuidadu Emerjénsia Obstétriku no Neonatal-Baziku (KemON-B) Fatuberliu.

Iha Lansamentu ne’e VMFIS hatete katak ho Lansamentu ida ne’e mak kompromisu boot atu proteje moris ho dignidade feto sira no bebé nomós atu garante katak família sira no komunidade sira iha Fatuberliu bele hetan kuidadu ho kualidade, iha tempu ne’ebe loloos ho dignidade besik liu iha sira nia uma.

Signifika kuidadu di'ak liu ba bebé moris foun iha oras no loron kritiku sira dahuluk bainhira halo intervensaun iha tempu loloos mak ita bele prevene mate, no bele evita defisiénsia iha tempu naruk, Sentru ida-ne’e hametin esforsu nasional atu hamenus mortalidade inan no bebé, liuhosi pontu 3 ne’ebe maka importante liu maka hanesan Asesu servisu besik liu, hamenus atrasu perigózu sira, Kualidade profisionál treinadu, protokolu padraun, no ekipamentu esensial, Kontinuidade kuidadu ligasaun referénsia ne’ebé di'ak liu ba servisu nivel aas bainhira presiza.

VMFIS mos hato'o agradesementu ba profisionál saúde no staf iha Fatuberliu, ne’ebé sira nia servisu no halo realizasaun ida-ne’e sai posivel, sira nia profisionalizmu, kompaixaun no dedikasaun mak halo servisu ida-ne’e bele la'o.

UNFPA lori esperiénsia globál no kolaborasaun metin, ne’ebé ajuda transforma investimentu ba rezultadu prátiku ne’ebé salva moris. Hamutuk, ita hametin kuidadu saúde primáriu no servisu inan no bebé foun iha fatin sira ne’ebé presiza liu tan.

Bainhira ita lansa sentru ida-ne’e, ita mós reafirma ita nia responsabilidade atu garante katak sentru ida-ne’e funsiona tuir standard ne’ebe lós iha staf, iha ekipamentu no aimoruk integra iha servisu nasional saúde.

Ministériu Saúde kompromete atu apoia supervizaun, formasaun kontínua, medikamentu esensial no material médiku, sistema referénsia no komunikasaun ne’ebé fiável.

Iha biban ne’e VMFIS mos hato’o agradesementu ba Governu Japáun, tanba sira nia apoiu hodi hametin sistema saúde Timor-Leste, kompromisu ida-ne’e fó dalan ba Ministériu Saúde atu estabelese sentru KemON-B hamutuk 20.

VMFIS mos hatete mai ita hamutuk kontinua tau matan ba ita nia determinasaun atu haruka Sentru KemON-B to’o iha território tomak, hodi garante katak la iha feto ida ne’ebé lakon asesu ba servisu saúde reprodutiva ne’ebé bele salva moris, hau fiar loos katak Sentru KemON-B ida-ne’e bele sai fatin ida ne’ebé salva moris, família sira hetan apoiu, proteje ita nia futuru ba dezenvolvimentu Timor-Leste ne’ebe sustentável.

Partisipa iha eventu ne’e maka Pesoal Saúde sira, Komunidade, Reprezentante Autoridade Munisipiu Manufahi, PNTL, Kuadru Ezekutivu Ministeriu saúde nian balun no seluk-seluk tan.