𝟏𝟓 𝐀𝐛𝐫𝐢𝐥 𝟐𝟎𝟐𝟔

===========

Konsellu Ministru sira hala’o sorumutu iha Palásiu Governu, Díli, Kuarta, 15 Abril 2026, aprova ona projetu Rezolusaun Governu, ne’ebé aprezenta hosi Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, kona-ba Kriasaun Komisaun Interministeriál ba Akompañamentu Projetu Konstrusaun Sentru Konvensaun Internasionál (SKI).

Rezolusaun Governu ida-ne’e kria mekanizmu koordenasaun interministeriál ida atu garante akompañamentu kontínuu ba projetu konstrusaun Sentru Konvensaun Internasionál, ne’ebé rekoñese nu’udar inisiativa estruturante ba dezenvolvimentu ekonómiku, promosaun turizmu no hasa’e kualidade sidade Dili nian.

Rezolusaun ne’e estabelese konstituisaun komisaun ida ne’ebé ho natureza téknika no konsultiva, ne’ebé organiza iha grupu traballu rua.

Grupu traballu ida asume funsaun sira dezenvolvimentu projetu nian, ho responsabilidade ba akompañamentu tékniku ba obra, kontrolu kualidade, no verifikasaun ba espesifikasaun konstrusaun nian, enkuantu grupu traballu ida seluk asegura koordenasaun interministeriál iha nivel supervizaun nian, ho partisipasaun hosi reprezentantes hosi ministériu oioin no entidade públika relevante sira.

Entre funsaun prinsipál sira ne'ebé atribui ba komisaun ida-ne'e maka akompañamentu ba faze oioin projetu nian, koordenasaun entre entidade sira ne'ebé envolve, monitorizasaun ba prazu, kustu, no risku finanseiru, no mós identifikasaun ba limitasaun ruma no proposta medidas korretivas. Prevee mós elaborasaun relatóriu periódiku no hala'o sorumutu regulár hodi avalia progresu obra ne’e.

Koordenasaun jerál ba komisaun ne’e iha responsabilidade husi Vise-Primeiru-Ministru, ho apoiu tékniku, administrativu no lojístiku ne’ebé fornese husi ninia gabinete, atu nune’e bele garante efikásia husi akompañamentu no koerénsia iha ezekusaun projetu estratéjiku ida-ne’e.