𝟏𝟕 𝐀𝐛𝐫𝐢𝐥 𝟐𝟎𝟐𝟔

==========

Vise-Primeiru-Ministru, Ministru Koordenadór ba Asuntu Ekonómiku (MKAE) no Ministru Turizmu no Ambiente (MTA), Dato’ Seri Francisco Kalbuadi Lay, fó pose ba Diretór Ezekutivu Ajénsia ba Promosaun Investimentu no Esportasaun Timor-Leste, I.P., Duílio Marino Gusmão Araújo da Silva no Roberto da Costa Cabral Lai ba kargu Adjuntu Diretór Ezekutivu Ajénsia Promosaun Investimentu no Esportasaun Timor-Leste, I.P., dezignada hanesan TradeInvest Timor-Leste ba mandatu tinan-tolu nia laran.

Serimónia tomada de posse ba dirijente máximu TradeInvest sira hala’o iha Gabinete Vise-PM, Farol, Díli, Sesta, 17 Abril 2026, iha ne’ebé hetan partisipasaun husi Prezidente Komisaun Funsaun Públika (KFP), Agostinho Letêncio de Deus, Komisáriu KFP ba asuntu Planeamentu Forsa Traballu, José Telo Soares Cristovão no mós konvidadu sira seluk.

Governu fó fiar ba dirijente na’in rua ne’e hodi asume kargu importante sira tanba haree ba iha formasaun akadémika, esperiénsia profisionál ne’ebé apropriadu, kompeténsia téknika no aptidaun ne’ebé nesesáriu atu hala’o funsaun korrespondente sira.

Liuhusi diskursu, Vise-PM, MKAE no MTA, Dato’ Seri Francisco Kalbuadi Lay, hatete katak, serimónia tomada de posse ne’e marka inísiu responsabilidade solene ida ba nasaun, ba ekonomia no importante liu ba povu Timor-Leste.

“Okaziaun importante ida ohin, ita mai hamutuk hodi asiste no selebra momentu signifikativu ida iha TradeInvest Timor-Leste nia moris pose ba ita-nia Diretór Ezekutivu foun no Adjuntu Diretór Ezekutivu.

Serimónia ida-ne'e la'ós de'it formalidade ida ka kauza ida ba selebrasaun de'it. Maibé, ida-ne'e marka inísiu responsabilidade solene ida responsabilidade ida ba ita-nia nasaun, ba ita-nia ekonomia, no importante liu, ba povu Timor-Leste.

Kargu sira ne'ebé ita-boot asume ohin maka pozisaun sira ne'ebé iha konfiansa no devér boot. Sira la'ós ba euforia pesoál, ka ba glória individuál. Envezde, sira husu ba kompromisu ida ne'ebé klean no dura atu serbí ho integridade, vizaun, no dedikasaun. Ita-nia rain hasoru dezafiu barak, maibé mós promesa barak.

Papél TradeInvest Timor-Leste sentrál hodi aproveita oportunidade sira ba komérsiu no investimentu ne’ebé sustentável, ne’ebé sai baze ba dezenvolvimentu no prosperidade ita-nia nasaun nian.

Molok ita haree ba oin, mai ita para uitoan hodi hato'o ita-nia apresiasaun ho laran tomak ba Diretór Ezekutivu sesante. Ita-boot nia esforsu sira ne'ebé la kolen, kompromisu ne'ebé metin, no lideransa vizionáriu hala'o ona papél instrumentál ida iha instituisaun nia kreximentu no evolusaun.

Iha Ita-Boot nia matének iha TradeInvest Timor-Leste harii ona fundasaun ida ne’ebé metin, ne’ebé ita bele harii no habelar ho fiar-an. Ita-boot nia kontribuisaun sira ajuda ona hasa'e instituisaun ba nível influénsia no impaktu ne'ebé ita haree ohin loron, no ba ida-ne'e, ami agradese tebes.

Ba ita-nia Diretór Ezekutivu foun no Adjuntu Diretór Ezekutivu, dalan iha oin sei ezijente maibé rekompensativu. Ha'u husu ba ita-boot sira atu lori ba oin legadu servisu dedikadu nian, atu lidera ho aten-barani no matenek, no atu haburas kultura ida transparénsia, inovasaun, no kolaborasaun nian. Ita-boot sira-nia lideransa tenke aliña besik ho objetivu dezenvolvimentu nasionál sira ne'ebé luan liu, hodi tau nafatin iha fuan ita-nia povu nia aspirasaun sira.

Keta haluha, imi-nia papél sira hetan fiar husi sidadaun Timor Leste. Susesu husi ita-boot nia mandatu sei sukat husi progresu tanjível ne'ebé ita-boot ajuda atu realiza iha atrasaun investimentu sira ho kualidade, habelar oportunidade sira komérsiu nian, no kontribui ba dezenvolvimentu sustentável ita-nia ekonomia nian. Hakohak misaun ida-ne'e ho espíritu responsabilidade no kompromisu ne'ebé la nakdoko.

Wainhira imi hakat ba imi-nia papél foun, hatene katak imi iha apoiu tomak husi governu, ami-nia parseiru sira, no parte interesada sira hotu ne’ebé fahe vizaun ba Timor-Leste ne’ebé prósperu. Ami iha konfiansa tomak ba imi-nia abilidade no dedikasaun hodi lori TradeInvest Timor-Leste ba otas foun.

Ha’u hato’o parabéns dala ida tan, no ha’u dezeja susesu tomak ba ita-boot sira hodi kumpre kna’ar sira ne’ebé iha oin. Ita-boot nia servisu bele lori benefísiu ne'ebé dura ba ita-nia nasaun no povu,”subliña Vise-PM, MKAE no MTA.

Iha okaziaun, Prezidente Komisaun Funsaun Públika (KFP), Agostinho Letêncio de Deus, husu ba Diretór Ezekutivu no Diretór Adjuntu TradeInvest atu hala’o knaar tuir regra, planu no orientasaun hosi superiór sira hodi kontribui ba objetivu instituisaun nian.

“Ita-bo’ot sira jura atu hadi’a, ita-bo’ot sira jura atu tane aas interese Estadu, jura no tane aas polítika IX Governu nian. Iha aktu administrasaun públika, mudansa estrutura buat ida ne’ebé normál, nune’e atu bele kria inovasaun, bele lori mós mudansa, maibé mós atu lori kontinuasaun ba servisu sira ne’ebé mak la’o tiha ona. Tempu ruma pose ne’e bele ba fali seluk, bele akontese aban, bainrua. Ne’eduni pose ne’e nu’udar responsabilidade ida ne’ebé mak Governu fó ba ita ida-idak atu iha responsabilidade no tane aas interese Estadu nian,”dehan Prezidente KFP ne’e.