Hera, 17 Abril 2026 — Sekretáriu Estadu Kooperativas (SEKoop), Arsénio Pereira da Silva, hamutuk ho ninia delegasaun inklui Diretór Geral, Eng. Olderico Lopes, xefe Gabinete, Francisca L de Araújo Simith, kargu diresaun no xefia inklui asesor sira no kamponezes sira husi Munisipiu Likisá, hala’o vizita kortézia no reuniaun koordenasaun ho Heineken iha Hera.

Reuniaun ne’e ho objetivu atu hametin kooperasaun entre governu no setor privadu, liu-liu kona-ba fornesementu produtu prima lokal hanesan Bafo Kayrala husi produtór sira ba kompania atu uza iha produsaun serveja.

Iha oportunidade ne’e, SEKoop hato’o agradese ba Heineken tanba abertura no vontade atu servisu hamutuk ho produtór sira iha Timor-Leste. Tuir Sekretáriu Estadu, durante ne’e, produtór no komunidade sira seidauk iha garantia merkadu ba produtu Bafo Kayrala, maibé liu husi kooperasaun ida ne’e sei bele loke merkadu boot ida ba sira.

“Kooperasaun ida ne’e importante tebes tanba bele fasilita produtór sira atu asesu merkadu no aumenta rendimento ekonomia lokal,” hateten Arsénio Pereira da Silva.

Governu liu husi SEKoop mos planeia atu halo asinatura Nota Entendimentu (MoU) ho Heineken no reprezentante produtór sira, hodi regula no garante sustentabilidade servisu hamutuk ba futuru.

Ikus liu SEKoop mos enkoraja ba produtór sira iha rai laran atu kontinua hasa’e produsaun ho kuantidade no kualidade di’ak atu garante konfiansa merkadu iha futuru.

Iha tempu hanesan, Supply Chain Manager Komang Satria Wibawa hatudu ninia kontentamentu ba inisiativa ne’e, tanba bele ajuda hamenus dependénsia ba materia prima husi rai liur no promove utilizasaun produtu lokal.

Hafoin reuniaun, delegasaun SEKoop kontinua ho vizita ba instalasaun Heineken atu observa prosesu produsaun no armajenamentu. Iha okaziaun ne’e mos entrega amostra Bafo Kayrala ba Country Manager Who Hock Khor, inklui hatudu produtu serveja ne’ebé produz 100% husi materia prima lokal.

#Média SEKoop#