DILI 17 abril 2026 – Ministériu Agrikultura, Pekuária, Peska no Floresta (MAPPF), liuhusi Diresaun Jerál Pekuária no Veterinaria, organiza workshop estratéjiku hamutuk ho lider komunitáriu sira iha Munisípiu Dili. Inisiativa ne'e atu hametin koordenasaun inter-institusionál iha baze hodi responde ba emerjénsia saúde públika, liuliu iha kampaña "Kontrolu no Prevensaun Moras Raiva".

Iha Intervensaun Sekretáriu Estadu Pekuária no Veterinaria (SEPV), José Vieira de Araújo katak kampaña nasionál ne’e la’ós de’it responsabilidade tékniku nian maibé ezije kolaborasaun faktu husi entidade hotu-hotu. “Evoluasaun moras animál la’o tuir dinámika sosiál, tan ne’e ita presiza serbisu hamutuk.

Governu mós planeia ona atu realiza sensus no rejistu populasaun animál, hanesan asu no fahi, hodi garante kobertura vasinasaun ne’ebé luan no efetivu,” dehan SEPV José Vieira. Iha fatin hanesan, Diretora Nasionál Veterinária, Joanita B. da Costa Jong, informa katak kampaña vasinasaun ne’ebé hala’o dezde 2024 to’o 2026 ne’e konsege ona vasina animál hamutuk rihun 84, ho foku prinsipál ba asu no busa.

Nia mós garante katak estoque aimoruk ba vasina ne’ebé iha daudaun sufisiente atu kobre nesesidade nasionál to’o tinan 2026. Atu asegura susesu kampaña ne’e, Governu Austrália liuhusi Departamentu Agrikultura fó ona apoiu vasina hamutuk rihun 200. Husi totál ne’e, aimoruk doze rihun 150 mak to’o ona iha rai-laran, no rihun 80 resin uza ona ba animál sira iha Dili no mós munisípiu seluk. Alende kampaña iha baze, ekipa tékniku sira kontinua mós fó atendimentu loroloron ba komunidade iha Klínika Veterinária Comoro.

Workshop ne'e hetan partisipasaun husi Vise-Ministru ba Fortalesimentu Institusionál Saúde, José dos Reis Magno; Diretór Servisu Agrikultura Munisipál, Marcelino Mendonça Pereira; Autoridade Munisípiu Dili; inklui mós Administradór Postu, Xefe Suku, no Xefe Aldeia sira iha kapitál laran.