𝑫𝒊́𝒍𝒊, 14 𝑨𝒃𝒓𝒊𝒍 2026

Sua Eselénsia Ministru Petróleu no Rekursus Minerais, Francisco da Costa Monteiro realiza enkontru produtivu ida kona-ba dezenvolvimentu projetu Greater Sunrise ho Señora, Katrina Cooper hanesan Reprezentante Espesiál husi Austrália ba Projeto Greater Sunrise no Señora Embaixadora Austrália ba Timor-Leste, Caitlin Wilson.

Ba Sua Eselénsia Ministru Monteiro, prosesu negosiasaun konklui pozitivamente iha fulan marsu, ho finalizasaun Kódigu Mineiru ba Petróleu (PMC – Sigla iha inglez), ne’ebé hanesan kuadru regulatóriu atu guia explorasaun, dezenvolvimentu no jestaun ba rekursus petrolíferu iha kampu Greater Sunrise. Konkluzaun ba dokumentu ne’e, simboliza akordu inisiál, hodi prosede ba diskussaun Regime fiskal (fiscal Regime) no Kontratu Fahe Produsaun (Production Sharing Contract).

Sua Eselénsia Ministru fiar katak, alkansu ba PMC fundamental tebes, atu dudu konklusaun husi PSC no regime fiscal aplikável ba Greater Sunrise iha tinan 2026 nia laran. Dokumentu ne’ebé ekipa designadu deskuti, konsta mos dispozisaun sira kona-ba papél estadu Timor-Leste no Austrália, atu orienta no akompaña ba dezenvolvimentu kampu petrolíferu ne’e, inklui realizasaun estudu konjunta hamutuk ho empreza Woodside iha Natarbora no mos iha Offshore.

Ekipa designadu husi Timor-Leste no Austrália kontinua halo diskusssaun virtual ho intensa, hodi finaliza kestaun pendente assosiadu iha Kontradu Fahe Produsaun no Rejime Fiscal ne’ebé define devér no obrigasaun husi produsaun no benefísiu ne’ebé hetan husi prosesu explorasaun no mos prepara ronda negosiasaun prezensiál ne’ebé sei realiza iha Fulan Juñu iha Timor-Leste no iha Cambera Austrália.

Hafoin finaliza enkuadramentu legál no kontratuál sira ba dezenvolvimentu Greater Sunrise, empreza Joint Venture tenke submeter konseitu ba dezenvolvimentu ba projetu Greater Sunrise, hodi permite estadu Australiana no Timor-Leste atu deside konseitu úniku ne’ebé tenke avansa. Ba Timor-Leste, governu defende firmamente katak, kadoras husi Greater Sunrise dada mai Timor-Leste, hodi prosesa iha Natarbora.