Díli, 16 Abril 2026|𝐒𝐮𝐚 𝐄𝐱𝐜𝐞𝐥𝐞̂𝐧𝐜𝐢𝐚 𝐒𝐞𝐜𝐫𝐞𝐭𝐚́𝐫𝐢𝐨 𝐝𝐞 𝐄𝐬𝐭𝐚𝐝𝐨 𝐝𝐚𝐬 𝐅𝐥𝐨𝐫𝐞𝐬𝐭𝐚𝐬 𝐄𝐧𝐠. 𝐅𝐞𝐫𝐧𝐚𝐧𝐝𝐢𝐧𝐨 𝐕𝐢𝐞𝐢𝐫𝐚 𝐝𝐚 𝐂𝐨𝐬𝐭𝐚, 𝐒.𝐇𝐮𝐭, Akompañia Ministro Agrikultura, Pekuária, Peska no Floresta (MAPPF) Eng. Marcos MAMETA da Cruz, hala’o Enkontro Harmonizasaun ho Parseiru Dezenvolvimentu sira iha Ministériu Finansas, Dili, atu koordena no sinkroniza atividade sira iha Setór Agrikultura, Pekuária, Peska no Floresta iha Timor-Leste.

Intervensaun S.E. Ministru MAPPF, hateten katak enkontru ida-ne’e realiza tinan-tinan ho objetivu atu hametin relasaun servisu entre Ministériu no Parseiru Dezenvolvimentu sira ne’ebé fó apoiu ba programa sira iha Setór Agrikultura.

“Enkontro Harmonizasaun ida-ne’e importante tebes atu reforsa kordenasaun entre ator hotu ne’ebé envolve iha dezenvolvimentu no implementasaun servisu sira iha Setór Agrikultura, Pekuária, Peska no Floresta,” dehan Ministru.

Nia esplika katak Governu hakarak asegura sinkronizasaun programa, aumenta efisiénsia no atinje rezultadu sustentável ba povu, liu-liu komunidade sira iha área rurál.

Iha enkontru ne’e mos marka presensa hosi embaixadór sira hanesan hosi Japaun no Estadu Unidu Amérika, ne’ebé partisipa iha diskusaun no fahe sira nia esperiénsia kona-ba programa no servisu ne’ebé implementa tiha ona durante tinan ida liubá.

Ministru Marcos subliña katak kooperasaun entre Governu no Parseiru Dezenvolvimentu durante ne’e fó ona impaktu pozitivu, liu-liu iha área hortikultura, pekuária, akuakultura no peska.

Nia fó ezemplu katak iha Setór Peska, konsumu ikan hosi komunidade aumenta hosi 6.1 kilograma iha tinan 2012 ba 8.7 kilograma agora, ne’ebé hatudu progresu no rezultadu konkretu hosi esforsu hamutuk.

Maski nune’e, nia mos admite katak iha dezafiu balun iha implementasaun programa sira, liu-liu iha área kordenasaun ho autoridade munisípiu sira. Ezemplu, distribuisaun hand tractor iha Munisípiu Viqueque no Covalima seidauk lao di’ak tuir planu.

Tanba ne’e, enkontru ohin konsidera importante atu buka solusaun no hadi’a frakeza sira, atu programa dezenvolvimentu bele implementa ho efisiente no efetivu liu.

Governu espera katak ho kordenasaun ne’ebé di’ak liu, atividade sira iha Setór Agrikultura no Peska bele fó benefísiu direta ba povu, hodi aumenta rendimentu no hadi’a kondisaun moris komunidade sira.