Dili 14 Abril 2026

Autoridade Aviasaun Sivil Timor-Leste, Institutu Publiku (AACTL, I.P.), iha parséria ho Japaun Radio Air Navigation Systems Association (JRANSA) ho apoiu husi Governu Japaun no Sekrétariadu ASEAN, ofisialmente abertura workshop loron rua (2) nian "GNSS Implementation Plan Training in ASEAN (GIPTA 2.0) Timor-Leste Site Workshop".

Workshop ne'ebé realiza durante loron rua hahú husi loron 14 too 15 Abril 2026, nu'udar programa esensiál ida bá aviasaun sivíl iha rejiaun ASEAN tomak tanba ne’e workshop ida ne’e partisipa mós delegasaun sira husi Estadu Membru ASEAN seluk hanesan Indonézia no Filipina, nomos espertu tékniku husi Japaun.

Programa ida ne’e foka bá implementasaun sistema navigasaun bazeia bá satélite, inklui GNSS, GBAS, no SBAS, atu hadi'a seguru, asesibilidade nomos efisiénsia operasionál aviasaun.

Iha diskursu abertura nian, Prezidente AACTL, I.P., Zezinho António Gusmão subliña importánsia estratéjika husi workshop ida ne’e bá Timor-Leste nu'udar Estadu-Membru foun iha ASEAN.

"Nu'udar Estadu-Membru foun iha komunidade ASEAN, Timor-Leste iha etapa krusiál iha ninia jornada dezenvolvimentu aviasaun. Workshop ida-ne'e la'ós de'it oportunidade ida, maibé nu'udar inisiativa ne’ebé importante tebes. Nune’e bele suporta ita-nia esforsu tomak atu garante servisu transporte aéreu ne'ebé seguru no efisiente nomos prepara Timor-Leste atu kumpre rekezitus aviasaun rejionál no globál," Prezidente AACTL subliña.

Prezidente mós hato’o ninia apresiasaun bá Governu Japaun liuhusi Japan-ASEAN Integration Fund (JAIF), JRANSA no Sekrétariadu ASEAN tanba kontinua fó asisténsia ténika nomos komitmentu atu fortalese kapasidade aviasaun iha Estadu-Membru ne'ebé dezenvolve.

Workshop ida ne’e partisipa mós husi Sr. Yukio Hasebe, Managing Director JRANSA, no Sr.Aung Soe Moe husi Sekretariadu ASEAN, Sra.Yayoi Kawabe, reprezentante husi Missaun Japaun bá ASEAN, ne’ebé reafirma sira nia apoiu bá seguru aviasaun nomos integrasaun rejionál.

Ajenda workshop inklui sesaun tékniku kona-bá operasaun GNSS, operasaun voo SBAS, proposta Dezenvolvimentu Testbed ASEAN-SBAS no diskusaun kona-bá interfenénsia rádiu frekuénsia GNSS (RFI) nomos spoofing.

Ikus liu, Inisiativa GIPTA 2.0 ne'e finansiadu husi Japan-ASEAN Integration Fund (JAIF) no implementadu husi JRANSA, liuhusi koordenasaun ho Sekrétariadu ASEAN nomos Estadu-Membru ASEAN.

Workshop ne’ebe hala’o iha nasaun Timor-Leste ne'e reprezenta pasu importante iha prosesu dezenvolvimentu kapasidade rejionál ne'ebé luan liu atu prepara implementasaun sistema navigasaun bazeia bá satélite iha área ASEAN.

https://sdi.gov.tl/ministerio/presrealease/create 

𝐌𝐞́𝐝𝐢𝐚 𝐌𝐓𝐊