Dili, 15-04-2026—Diretora Nasionál Dezenvolvimentu Igualdade Jéneru (DNDIJ-SEI), Sra. Olga da Costa Monteiro hamutuk ho CEO FA Fundasaun ALola, Sra. Maria Imaculada Guterres, no Membru Grupu Traballu Jéneru sira hotu husi Liñas parte Governu no Sosiedade Sivíl hala’o abertura ba iha Enkontru kona-ba Atu Asegura Grupu Traballu Advokasia ne’ebé efetivu ba Feto no Labarik-Feto iha Timor-Leste, ne’ebé mak organiza husi Fundasaun Alola, iha Salaun Enkontru Sentru Rekursu Feto / Eis Edifisiu Veteranus Taibesi.

Objetivu prinsipál husi Enkontru refere mak, atu Identifika dezafiu sira ne’ebé seidauk rezolve, Avalia progresu desde tinan 2024 to’o oras ne’e no hametin mekanismu koordenasaun entre entidade relevante sira.

Diretora Nasionál Dezenvolvimentu Igualdade Jéneru (DNDIJ-SEI), Sra. Olga da Costa Monteiro, iha nia intervensaun hatete, Sekretaria Estadu ba Igualdade konsidera Implementasaun Planu Asaun Nasionál Violénsia Bazeia ba Jéneru (PAN-VBJ 2022-2032) nu’udar prioridade Nasionál ida. Planu ida ne’e la’os de’it dokumentu Polítika, maibe hanesan guia estratéjiku atu prevene no responde.

Iha kontestu ida ne’e, enkontru ohin loron importante tebes atu Identifika dezafiu sira ne’ebé seidauk rezolve, Avalia progresu desde tinan 2024 to’o oras ne’e no hametin mekanismu koordenasaun entre entidade relevante sira.

SEI mós hakarak hato’o apresisaun ba Fundasaun Alola nia papél imprtante liu-liu iha pilar prevensaun hodi promove konsiénsia no edukasaun iha komunidade sira.

Iha pilar prevensaun, PAN-VBJ 2022-2032 fó enfaze ba importansia mudansa atitude no norma sosiál sira ne’ebé la tolera violénsia. Iha ne’e ita fó prioridade ba, promosaun konsiénsia publika liuhusi kampaña edukativa iha nivél nasionál no komunidade, atu muda mentalidade no halo violénsia sai la asitavél.Edukasaun ba Labarik no joven sira iha eskola no fora eskola, kona-ba igualdade jéneru, respeitu no relasaun ne’ebé saudavél.Envolvimentu mane no Lider Komunitáriu sira atu sai parte husi solusaun no lidera mudansa iha sira nia komunidade.Fortalesementu kapasidade ba prestadór servisu sira atu detekta no prevene kazu sira.Koordenasaun intersetoriál ne’ebé forte atu segura katak esforsu prevensaun sira harmonizadu no efetivu iha teritóriu tomak.

Relatório implementasaun PAN VBJ tinan 2024-2025 (Parseiru Dezenvolvimentu TAF Nabilan) (servisu sira ba liña front line, atendementu ba vbj la’o di’ak atendementu ne’ebé atu hatan ba sobrevivente sira la’o di’ak.

Sekretaria Estadu ba Igualdade kompremete atu kontinua servisu hamutuk ho parseiru sira, inklui Fundasaun Alola, atu implementa medida prevensaun sira ne’e ho di’ak, bazeia ba evidensia no responde ba realidade iha komunidade sira.

Ba oin ita presiza servisu hamutuk no kompromisu metin atu asegura katak servisu ba vítima sira sai asesivel, inkluzivu no efetivu liutan. Governu liuhusi SEI, sei kontinua apoia no fasilita koordenasaun ne’ebé forte entre perseiru hotu.

Ikus liu ha’u hakarak reafirma liutan katak, luta hasoru violénsia Bazeia ba Jéneru mak responsabilidade ema hotu nian. Ita hotu iha papél importante atu kria sosiedade ida ne’ebé seguru, justu no respeita direitu ema hotu.

Hafoin husi Enkontru refere, iha mós vizita mós ba Fetin Produsaun Tais Timor-Leste nian, ne’ebé produs husi iha Soru Nain sira husi Munisípiu 12 inklui RAEOA.

Seremónia Enkontru ne'e mós partisipa husi Administradora Postu Administrativu /APA-Vera Cruz, Autoridade Lokal, no Xefe Aldeia Matando.

#Média-SEI#