𝗗Í𝗟𝗜, 𝗠𝗝 — 𝗦𝗲𝗴𝘂𝗻𝗱𝗮-𝗳𝗲𝗶𝗿𝗮, 𝟮𝟬 𝗔𝗯𝗿𝗶𝗹 𝟮𝟬𝟮𝟲, Sua-Eselénsia Ministru Justisa, Dr. Sérgio de Jesus Fernandes da Costa Hornai, hala’o reuniaun ofisiál ho reprezentante Australian Federations Police (AFP) hodi hametin kooperasaun ho Timor-Leste Police Development Program (TLPDP), iha sala sorumutu Gabinete Ministru Justisa, iha edifísiu Ministériu Justisa, Colmera, Díli.

Objetivu hosi reuniaun ne’e, atu halo kooperasaun entre Ministériu Justisa, Polícia Científica de Investigação Criminal (PCIC) no Timor-Leste Police Development Program (TLPDP). AFP mós reforsa operasaun global no realiña Timor-Leste ho ASEAN no ASEANPOL.

Iha reuniaun ne’e mós, aborda kona-bá progresu sira ne’ebé atinji ona, inklui analiza dezafiu sira ne’ebé mosu durante implementasaun programa kooperasaun ne’e. Nune’e mós, haree ba oportunidade sira seluk, hodi hametin liután kolaborasaun iha tempu oin mai, liuliu iha área investigasaun kriminal, partilla informasaun téknika, no reforsa kapasitasaun institusionál ba servisu sira ne’ebé relevante.

Ministru Justisa apresia tebes ba apoiu ne’ebé mak Australian Federal Police (AFP) fasilita liuhosi Timor-Leste Police Development Program (TLPDP) ba iha área dezenvolvimentu kapasidade institusionál no siguransa Timor-Leste ninian. Nune’e mós ko’alia kona-bá Konferénsia ASEAN 2029 iha Timor-Leste. Ministru mós hateten, kooperasaun dezde uluk to’o agora hatudu progresu importante, no husu atu reforsa liu tan ba iha futuru, liu-liu iha formasaun no treinamentu.

Reprezenta AFP mós akresenta, bazeia ba monitorizasaun no apoiu tékniku ba polísia Timor-Leste no sentru treinamentu atu hasa’e kapasidade operasionál entre PCIC no TLPDP konsidera hanesan exemplu di’ak ba parseria institusionál hodi kontinua hasoru dezafiu krime transnasional oi-oin hanesan Krime Organizadu, Tráfiku Umanu no Brakeamentu Kapital.

# 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 #