𝗗Í𝗟𝗜, 𝗠𝗝 — 𝗞𝘂𝗮𝗿𝘁𝗮-𝗳𝗲𝗶𝗿𝗮 𝟭𝟱 𝗔𝗯𝗿𝗶𝗹 𝟮𝟬𝟮𝟲, Sua-Eselénsia Ministru Justisa, Dr. Sérgio de Jesus Fernandes da Costa Hornai husu ba Diretor Jeral no Diretor Nasionál sira iha Ambitu Ministériu Justisa hodi fortalece integridade iha setór justisa, nun'ee bele garante prestasaun servisu públiku ne’ebé kualidade, transparente no responsavel ba sidadaun sira hotu, iha Ministériu Justisa.

Ministru Justisa hato’o lia-hirak ne’e, iha serimonia enseramentu kona-ba formasaun ho temátiku “𝗣𝗥𝗘𝗩𝗘𝗡𝗘 𝗡𝗢 𝗞𝗢𝗠𝗕𝗔𝗧𝗘 𝗞𝗢𝗥𝗨𝗣𝗦𝗔𝗨𝗡 𝗛𝗢𝗗𝗜 𝗣𝗥𝗢𝗠𝗢𝗩𝗘 𝗚𝗢𝗩𝗘𝗥𝗡𝗔𝗦𝗔𝗨𝗡 𝗗𝗜’𝗔𝗞 𝗡𝗢 𝗣𝗥𝗢𝗧𝗘𝗝𝗘 𝗗𝗜𝗥𝗘𝗜𝗧𝗨𝗦 𝗨𝗠𝗔𝗡𝗨𝗦 𝗜𝗛𝗔 𝗦𝗘𝗥𝗩𝗜𝗦𝗨 𝗔𝗗𝗠𝗜𝗡𝗜𝗦𝗧𝗥𝗔𝗦𝗔𝗨𝗡 𝗣𝗨́𝗕𝗟𝗜𝗞𝗨” durante loron tolu.

Objetivu prinsipal hosi formasaun ne’e, atu hasa’e konesimentu profisionál ba partisipante sira, hodi presta servisu públiku ho kualidade, efisiénsia no responsabilidade ba sidadaun sira.

Ministru Justisa, Dr. Sérgio Hornai, hateten, integridade mak sai hanesan koluna prinsipal iha dezenvolvimentu institusionál no iha esforsu atu hadi’a servisu públiku. Sem integridade, sei difisil atu atinji padraun kualidade ne’ebé di’ak no fó fiar ba sidadaun sira.

“Integridade la’ós de’it prinsipiu ida, maibé tenke sai hanesan kultura iha instituisaun sira hotu. Ho ne’e, ita bele garante katak servisu ne’ebé fó ba sidadaun sira sei la’ós de’it efisiente, maibé mos justo no transparente,” hatete Ministru Justisa.

Ministru Justisa apresia ba partisipante sira hotu ne’ebé hatudu interese no kompromisu atu partisipa iha atividade ne’e. Espéra katak, materiá no konesimentu ne’ebé sira simu durante formasaun sei iha utilidade teb-tebes atu hasa’e kapasidade profisionál, hametin integridade no responsabilidade, no prestasaun servisu iha sira nia fatin servisu.

Ministru Justisa, husu ba partisipante sira sei bele aplika konesimentu ne’ebé hetan hodi fó servisu públiku ne’ebé kualidade, efisiente no bele responde di’ak liu ba nesesidade sidadaun sira

“Parabens ba Provedór Direitus Humanus no Justisa, Virgilio Guterres “Lamukan” ba ita bo’ot ninia lideransa, ita bo’ot sira nia sabedoria ho estrutura tomak bele hamutuk oinsa maka ita bele buka loron ba loron atu bele hadi’a ita nia kualidade servisu iha ita nia administrasaun publika estadu ninian”. Ministru Justisa destaka.

Ministru Justisa, Dr. Sérgio Hornai, hamutuk ho Provedór Direitus Humanus no Justisa, Virgílio Guterres “Lamukan”, atribui sertifikadu simbolikamente ba partisipante na’in-4.

Iha okaziaun ne’e, Ministru Justisa hato’o agradese ba partisipante sira hotu, hahu hosi Diretór Jerál Polítika Justisa, Diretór Jerál Terras no Propriedade, Diretór Jerál Servisu Rejistu no Notariadu, Inspetora GIA, Koordenadór CFJJ, reprezentante hosi Komisaun ba Luta Kontra Tráfiku Umanu, no mós Diretór Nasionál sira hotu ne’ebé partisipa iha formasaun ne’e.

# 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 #