Asuntu : Ministra MSSI Entrega Uma Solidária ba Inan Faluk Amélia Iha Kuluhun Ministra Solidariedade Sosiál no Inkluzaun, Verónica das Dores akompaña husi Vise-Ministru ba Fortalesementu Institusionál, José dos Reis Magno, entrega uma Solidária ba inan faluk, Amélia da Costa Saldanha, iha Aldeia Toko Baru II, Suku Kuluhun, Postu Administrativu Cristo-Rei, Munisípiu Dili, Kinta-feira (11/09/2025). Iha serimónia simples entrega uma, Ministra dehan, uma ne'e la’ós uma kbiit-laek, maibé uma solidária ida-ne'e, tau liman hamutuk hodi ajuda ba família sira ne’ebé presiza. Uma ne’e halo iha forma simples, hanesan parte husi esforsu governu atu sustenta komunidade sira ne'ebé nesesita dunik. Uma ne’e la’ós uma ba kbiit-laek, maibé uma solidária, tanba uma ne’e tau liman hamutuk hodi fó ajuda ba família sira ne’ebé presiza, liuliu ba Amélia da Costa Saldanha, katak Ministra. "Ita sei kontinua monitoriza no tau matan ba Sra. Amélia, inklui Vise-Ministru ba Fortalesementu Institusionál sei mai hare'e nafatin avó iha loron ruma. Ha’u fiar katak, família sira iha ne’e no ita hotu sei tau liman hamutuk hodi kontinua kuidadu no tau matan ba avó Amélia," hatutan Ministra. Ministra mós agradese ba Lideransa Suku no komunidade ne’ebé koopera no fó kontribuisaun ba prosesu konstrusaun uma solidária ne’e finaliza ho di’ak, maski iha parte balun atu kompleta tan iha tempu besik. “Ha’u valoriza tebes kontribuisaun família avó Maria, ne’ebé hamutuk ho ekipa MSSI iha apoiu ba uma ne’e”, tenik Ministra. Uma ne'e harii husi ekipa konjunta husi funsionáriu MSSI inklui Gabinete Ministra, Gabinete Vise-Ministra no funsionáriu husi Sentru Nasionál Reabilitasaun.
Data Publica : 12 Sep 2025
Descrisaun :
