Dili, 20 Abril 2026; Vice-Ministro para a Operacionalização dos Hospitais (VMOH-sigla portugés), dr. Flávio Brandão Mendes de Araújo, sai oradór prinsipál iha semináriu sientífiku ne'ebé organiza hosi Faculdade Medicina e Ciência da Saúde, Departemento de Ciência Biomédicas e Laboratório iha ámbitu komemorasaun loron mundiál Laboratóriu, ho tema "Fortalecimento do papél dos laboratórios no Diagnóstico e Tratamento das Doenças em Timor-Leste", ne’ebé realiza iha salaun auditóriu FECT, Hera.

Tópiku ne'ebé VMOH lori mak "Política de Saúde e desenvolvimento nacional: Preparação do setor biomédico e laboratório para os desafios no futuro".

VMOH agradese ba estudante sira tanba bele konvida ona Ministériu saúde hodi partilla informasaun no fahe esperiénsia sira liuhosi semináriu sientífiku ida hanesan ne’e tanba bele rona akademísta sira-nia hanoin no inovasaun sira hodi kontribui ba estadu.

“Ha’u kontente tanba iha loron mundiál saúde ida-ne’e, oinsá mak uza siénsia hanesan baze ba ita-nia servisu sira, ita hotu hatene katak servisu saúde enjerál ne’e hanesan servisu ida kompleksu no dinámiku tanba nia interasaun entre ema, teknolójia no ambiente”, dehan VMOH.

VMOH hateten fakuldade medisina nia papél importante tebes atu implementa esperiénsia no koñesimentu sira-ne’ebé iha hodi fó asisténsia ba klínika ne’ebé di’ak liu.

“Imi-nia papél importante tebes, wainhira ita hala’o ita-nia knaar la’ós de’it ita-nia responsabilidade maibé ho implementasaun esperiénsia no koñesimentu ne’ebé iha ba pasiente sira, ita hotu konsiente katak ita-boot sira-nia papél ne’e importante liu atu kontribui mellora servisu asisténsia klínika, ita boot-sira tenki sai pesoál laborál ne’ebé nia integridade aas”

VMOH salienta, semináriu ida-ne’e importante tebes atu aumenta fakuldade medisina no siénsia saúde sira-nia koñesimentu iha jornada hanesan estudante.

“Semináriu ohin hodi bele aumenta imi-nia koñesimentu iha imi-nia jornada hanesan estudante hodi hetan profisaun ne’e ba futuru no sei lori profisaun ne’e iha ita-boot sira-nia kabaas no uza momentu sira ho di’ak hodi hasa’e kapasidade intelektuál, skill no itegridade pesoál hanesan ema saúde, no mai ita hotu kria ambiente saudável iha universidade no iha prosesu tomak aprendizajen nian atu bele kontribui di’ak liu”.