20 Abril 2026: Ministériu Saúde (MdS) hamutuk ho Delegasaun Timor-Leste partisipa iha sorumutu rejionál Dezenvolvimentu Koletivu ba Programa Servisu Setór Saúde ba Asosiasaun Nasaun Sudeste Aziátiku (ASEAN) nian, Iha Kuala Lumpur, Malázia.

Sorumutu importante ne’e foka ba dezenvolvimentu programa servisu ba tinan 2026–2030, no hametin reziliénsia saúde rejionál entre Kluster Saúde ASEAN 1–4, no sorumutu ne’e hala’o durante loron tolu (3) hahú husi loron 20 to’o 23 Fulan Abril tinan 2026.

Objetivu prinsipál hosi sorumutu ne’e mak atu asegura transisaun estratéjika hosi kuadru ida ba modelu dezenvolvimentu saúde rejionál iha futuru, ho konsisténsia ba prioridade saúde rejionál ne’ebé evolve no mós promove refleisaun koletiva, partilla koñesimentu no fortalese kolaborasaun ASEAN iha enfrenta dezafiu saúde públika emergente nebe sei opta Visaun Komunidade ASEAN ba tinan 20245.

Vise Diretor-Jerál (Saúde Públiku) iha Ministériu Saúde Malázia, dr. Ismuni bin Bohari, “hato’o bemvindu ba delegadu hotu no subliña importánsia reuñiaun ne’e hanesan espasu estratéjiku atu avalia progresu, identifika dezafiu, no planifika diresaun saúde rejionál ba futuru no oinsá adopta Ajenda Desenvolvimentu Saude (ADS) ASEAN pos 2025 (APHDA) no formula planu servisu ba períodu 2026–2030 ba iha setór saúde ASEAN”.

Sorumutu ne’e hetan partisipasaun husi reprejentante Estadu Membru ASEAN hanesan: Brunei Darusalam, Cambodia, Indonesia, Laos, Malázia, Myanmar, Filipina, Singapura, Thailandia, Timor-Leste no Vietnam.

Inklui mós reprezentante sira husi MdS no Instituisaun Saúde ne’ebé relasiona iha área Polítika, Planeamentu, Servisu Ospitál, Nutrisáun, Kuidadu Saúde Primária no Kooperasaun Internasionál ne’ebé serve hanesan representante ba nasionál kordenador Saúde Kluster 1-4.

#MídiaPalácioDasCinzas