Dili, 22 Abríl 2026

Ministru Transportes no Komunikasaun, Eng. Miguel Marques Gonçalves Manetelu, partisipa reuniaun Konsellu Ministru kuarta ne'e iha Palásiu Governu Dili.

Iha reuniaun ne'e governu liuhosi reuniaun Konsellu Ministru aprova ona projetu Dekretu-Lei, ne’ebé aprezenta hosi Ministru Transportes no Komunikasaun, Eng. Miguel Marques Gonçalves Manetelu, ne’ebé ho objetivu atu estabelese taxa ne’ebé tenke selu ba aktu no servisu Administrasaun Públika nian relasiona ho veíkulu motorizadu no nia kondutór sira.

Diploma ne’e define no klarifika rejime taxa ne’ebé aplika ba aktu no servisu ne’ebé Administrasaun Públika presta iha setór rodoviáriu, atu nune’e bele garante korrespondénsia entre servisu ne’ebé presta no ninia kustu ida-idak. Diploma ne’e, entre sira seluk, inklui prosedimentu relasionadu ho matríkula, rejistu, inspesaun veíkulu, emisaun títulu no lisensa sira, no mós ezame no dokumentu sira ne’ebé relasiona ho kondusaun.

Dekretu-Lei ne’e estabelese mós regras kona-ba kobransa taxa, identifikasaun ba sujeitu pasivu sira (ema ka instituisaun ne’ebé iha obrigasaun selu taxa) no posibilidade ba kobransa ne’ebé hala’o hosi entidade terseira parte sira, tuir termu sira ne’ebé define legalmente, hodi revoga rejime anteriór no prevee nia entrada iha vigór loron 30 hafoin nia publikasaun.

Projetu Dekretu-Lei ida-ne'e hetan ona deliberasaun iha sorumutu Konsellu Ministrus iha loron 21 fulan-janeiru tinan 2026. Maibé, tuir ajustamentus ne'ebé introdús iha faze redasaun finál, liuliu kona-ba reapresiasaun ba valór taxa ne'ebé sei kobra, presiza apresiasaun no aprovasaun filafali hosi Konsellu Ministrus ba Projetu Dekretu-Lei ida-ne'e.

https://sdi.gov.tl/ministerio/presrealease/create 

𝐌𝐞́𝐝𝐢𝐚 𝐌𝐓𝐊