Ainaro, 21 abríl 2026 - Ministériu Edukasaun liuhusi ekipa pedagójika no akompaña husi Sua Exelénsia Ministra Edukasaun Dra.Dulce de Jesus kontinua aprezenta rezultadu teste EGRA (Early Grade Reading Assessment) no EGMA (Early Grade Mathematics Assessment) ne'ebé ekipa husi Ministériu Edukasaun halo ba estudante sira iha eskola hotu iha munisipiu Ainaro.

Iha abertura, Sua Exelénsia Ministra Edukasaun Dra.Dulce de Jesus Soares informa, Ministériu Edukasaun estabelese ekipa pedagójika ida kompostu husi kurríkulu, INFORDEPE no Ensinu Báziku ho objetivu atu teste ida ba estudante klase 1 to 3 hodi haree sira-nia koñesimentu ba literasia no númerasia.

" Teste ida-ne'e foin dahuluk halo iha Timor-Leste no úniku mós iha mundu tanba bainhira ema halo teste ba estudante sira liuhusi sampel deit maibé ita-nia ekipa pedagójika la'o ba munisípiu hotu no halo teste ba estudante ida-idak", SE.Ministra Esplika.

Membru Governu ne'e argumenta, estudante husi klase 1 to'o 3 tuir hotu teste enkuantu ba sira ne'ebé la tuir maka sira ne'ebé iha loron teste hetan moras ka iha problema saúde tanba teste ida ne'e halo ho objetivu atu detekta problema ne'e iha ne'ebé no tanba sá akontese eatudante lee, hakerek no sura lahatene.

Nune'e iha aprezentasaun ne’e hetan Partisipasaun husi Prezidente Autoridade Munisipiu Ainaro, Ekipa pedagójika, Mentor, Diretór no koordenadór Eskola sira iha munisipiu Ainaro.

#EliasdaCosta

#MédiaME