𝐁𝐚𝐥𝐢𝐛𝐨, 𝟏𝟗 𝐀𝐛𝐫𝐢𝐥 𝟐𝟎𝟐𝟔 | Sua Eselénsia Sekretáriu Estadu Pekuária (SEPE) Sr. Jose Vieira de Araujo. Lic.CSH., Lic. Dir., MD., M.AP., hamutuk ho Xefi Gabinete Sekretáriu Estadu Pekuária 𝐒𝐫. 𝐍𝐢𝐥𝐭𝐨𝐧 𝐕. 𝐝𝐚 𝐂𝐨𝐬𝐭𝐚 𝐎𝐥𝐢𝐯𝐞𝐢𝐫𝐚 no Diretor Nasionál Pekuária (DNP) 𝐒𝐫. 𝐋𝐚𝐭𝐢𝐧𝐨 𝐆. 𝐝𝐨𝐬 𝐒𝐚𝐧𝐭𝐨𝐬 𝐂𝐨𝐢𝐦𝐛𝐫𝐚 halo vizita ba Komunidade hakiak nain sira iha Railuli Aldeia Futatas, Suku Kowa, Postu Administrativu Balibo, Munisipiu Bobonaro.

Haktuir ba informasaun balun ne'ebe mak Gabinete Sekretáriu Estadu (GASEPE) simu husi komunidade Suku Kowa katak sira nia animal lakon bebeik iha sira nia suku. Tamba ne'e mak Governante ne'e hamutuk ho komitiva tun direta hodi husu informasaun ba komunidade sira ne'ebe mak enfrenta hela problema ne'e.

Iha vizita ne'e Xefí Suku Kowa, Señor Ernesto da Cruz Maia hatete katak, "𝒍𝒉𝒂 𝒏𝒆'𝒆 𝒌𝒂𝒓𝒂𝒖 𝒔𝒆𝒎𝒑𝒓𝒆 𝒍𝒂𝒌𝒐𝒏 𝒕𝒂𝒎𝒃𝒂 𝒎𝒆𝒏𝒖𝒔 𝒑𝒆𝒔𝒐𝒂𝒍 𝒔𝒆𝒈𝒖𝒓𝒂𝒏𝒔𝒂 𝒏𝒐 𝒑𝒐𝒔𝒕𝒖 𝒔𝒆𝒈𝒖𝒓𝒂𝒏𝒔𝒂, 𝒉𝒐 𝒊𝒅𝒂 𝒏𝒆'𝒆 𝒏𝒊𝒂 𝒉𝒂𝒕𝒆𝒕𝒆 𝒌𝒂𝒕𝒂𝒌 𝒑𝒓𝒆𝒔𝒊𝒛𝒂 𝒂𝒖𝒎𝒆𝒏𝒕𝒂 𝒕𝒂𝒏 𝒑𝒆𝒔𝒐𝒂𝒍 𝒔𝒆𝒈𝒖𝒓𝒂𝒏𝒔𝒂 𝒏𝒐 𝒑𝒐𝒔𝒕𝒖 𝒔𝒆𝒈𝒖𝒓𝒂𝒏𝒔𝒂 𝒏𝒊𝒂𝒏 𝒂𝒕𝒖 𝒏𝒖𝒏𝒆'𝒆 𝒃𝒆𝒍𝒆 𝒔𝒆𝒓𝒗𝒊𝒔𝒖 𝒉𝒂𝒎𝒖𝒕𝒖𝒌 𝒉𝒐 𝑨𝒖𝒕𝒐𝒓𝒊𝒅𝒂𝒅𝒆 𝑳𝒐𝒌𝒂𝒍 𝒏𝒐 𝑲𝒐𝒎𝒖𝒏𝒊𝒅𝒂𝒅𝒆 𝒉𝒐𝒅𝒊 𝒃𝒆𝒍𝒆 𝒉𝒂𝒍𝒐 𝒑𝒓𝒆𝒗𝒆𝒏𝒔𝒂𝒖𝒏 𝒊𝒉𝒂 𝑭𝒖𝒕𝒖𝒓𝒖".

Hatan ba preokupasaun sira ne'e, Sekretáriu Estadu hatete katak nia sei koalia no kordena hamutuk ho ministériu relevante sira oinsá bele hare asuntu refere iha Suku Kowa ne'ebe mak fronteriza direta ho nasaun viziñu Indonésia no ekipa tekniku husi Ministeriu Agrikultura, Pekuaria, Peska no Florestas (MAPPF) liu-husi Sekretáriu Estadu Pekuária sei mai halo sosializasaun kona-ba Dekretu Lei Pekuaria nian.

Hafoin ida ne'e Sua Eselénsia Sekretáriu Estadu Pekuária (SEPE) ho ekipa akompaña husi Autoridade Lokal no komunidade sira ba hare hela natar fatin ne'ebe mak abandona hela durante tinan 10 nia laran.

Iha ne'eba Xefi Suku Kowa haktuir katak, natar ne'e abandona hela tamba menus material no ekipamentu agrikola atu servisu iha natar nian tamba ne'e mak komunidade sira labele halo natar.

Governante ne'e, hato'o mos ba komunidade sira katak natar fatin ne'e tenki utiliza ka revitaliza fali. Tambá rai ne'e potensial ne'ebe diak, no tenki hari fali grupu no halo pedidu liu-husi Prezidente Autoridade Munisipal (PAM) Bobonaro hodi hato'o ba Ministeriu Agrikultura, Pekuária, Peska no Florestas (MAPPF) inklui Ministériu relevante seluk hodi bele hare problema hirak ne'e no Sua Eselénsia Sekretáriu Estadu Pekuária husu ba komunidade sira tenki iha boa vontade duni hodi halo natar, halo to'os no hakiak animal.