𝗗Í𝗟𝗜, 𝗠𝗝 — 𝗦𝗲𝘀𝘁𝗮-𝗳𝗲𝗶𝗿𝗮, 𝟮𝟱 𝗔𝗯𝗿𝗶𝗹 𝟮𝟬𝟮𝟱, Sua-Eselénsia Ministru Justisa, Dr. Sérgio de Jesus Fernandes da Costa Hornai, ofisiálmente hato’o diskursu iha ambitu atividade formasaun karákter iha Sentru Treinamentu Komandante Nicolau Lobato, iha suku Manleuana, Postu Administrativu Metinaro.

Ministru Justisa hateten liahirak ne’e, iha serimónia Enseramentu Formasaun karáter ba Ajente Administrasaun Públika Ministériu Justisa (MJ)nian ho totál nain 100 ne’ebé kompostu hosi mane nain 61 no feto nain 39.

Formandu nain 100 ne’e, mai hosi Diresaun Jeral Terras Propriedades nain 50 no Diresaun Nasional Servisu Prizional no Reeserasaun Sosial nian nain 50. Ajente Administrasaun Públika Ministériu Justisa ho totál na’in 100 ne’ebé kompostu hosi mane na’in 61 no feto na’in 39.

Formasaun ida-ne’e, ho objetivu prinsípál atu dezenvolve karákter ne’ebé forte, ho nivel integridade aas, hodi forma indivíduu sira ne’ebé responsavel, disiplinadu no iha komitmentu ba valór étika no morál iha vida pessoal no profisionál.

Iha okaziaun importante ida-ne’e, ha’u hato’o parabéns no apresiasaun ba ita boot siras hotu ne’ebé konsege remata ho susesu formasaun karákter ida-ne’e. Ita bo’ot sira hetan priviléjiu ida atu partisipa iha prosesu ida ne’ebé la’ós de’it hasa’e abilidade téknika, maibé liu-liu hametin integridade, hasa’e konhesimentu no prepara ita atu integra ho di’ak iha servisu administrasaun públika Estadu nian.

Objetivu prinsípál mak atu garante katak instituisaun públika sira bele hetan konfiansa hosi povu, liuhosi prestasaun servisu ne’ebé efisiente, efikaz no justu, liuliu ba komunidade sira. Servisu prizionál no área sira seluk iha Ministériu Justisa liga diretamente ho direitu fundamentál sidadaun sira nian.

Tanba ne’e, ita boot sira ne’ebé sei sai funsionáriu públiku tenke iha karákter forte, integridade aas no kapasidade atu hasoru situasaun sira ho profisionalizmu. Formasaun ida-ne’e hanorin ita atu dezenvolve disiplina, ética, onestidade, responsabilidade no respeitu ba prinsipiu legalidade, inklui obedénsia ba orientasaun legítima hosi superior sira.

Hau hakarak destaka katak inisiativa formasaun karákter ida-ne’e mosu hosi desizaun polítika ida ne’ebé resulta hosi koordenasaun entre Ministériu Justisa no Komisaun Funsaun Públika, ne’ebé depois aprezenta ba Governu, liuliu ba IX Governu Konstitusionál. Governu define prioridade ba reforma administrasaun públika, ho objetivu prinsípál atu:

1. Hametin instituisaun Estadu nian atu povu bele iha konfiansa;

2. Forma rekursu umanu ne’ebé iha abilidade, integridade no responsabilidade aas;

3. Assegura aplikasaun rigorózu ba prinsipiu legalidade;

4. Promove dezenvolvimentu kapasidade liuhosi formasaun no aperfeisoamentu kontínuu.

Ita boot sira, hanesan formandu foun, iha dever atu kumpri juramentu no responsibilidade ne’ebé bazeia ba Konstituisaun no lei sira. Servisu públiku tenke orienta ba interesu públiku, ho komitmentu atu serve komunidade ho lalais, efisiente no ho sensu justisa.

Hau mos hakarak enkoraja ita boot sira atu dezenvolve “paixaun servisu” no espírito patriótiku, hanesan ema sira ne’ebé durante luta libertasaun hatudu dedikasaun no sakrifísiu ba nasaun. Valor sira ne’e tenke kontinua moris iha ita boot sira-nia komportamentu lor-loron, atu garante katak ita bele sai lider no profisionál ne’ebé di’ak iha futuru.

Parabéns ba ita boot sira hotu. Ida-ne’e mak foin pasu inisiál ida. Hau espera katak ita boot sira sei kontinua dezenvolve an no kontribui ba konstrusaun administrasaun públika ne’ebé forte, íntegra no preparadu atu responde ba dezafiu sira iha futuru.

Iha serimónia enseramentu partisipa hosi Sekretáriu Estadu Terras Propriedades, Membru Parlamentu Nasional, Prezidente Komisaun Funsaun Públika, Reprezentante Brigaderu Jeneral das Forsas Armadas, inklui Komisáriu sira iha komisaun Funsaun Públika, Drijentes iha ámbitu MJ nian, administradór Postu Administrativu Metinaro no formandu sira.

# 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 #