DILI ,24 Abril 2026 – Sekretaria Estadu Formasaun Profisionál no Empregu (SEFOPE) liu husi Diresaun Nasional Empregu no Estranjeiru (DNEE) hala'o lansamentu atividade treinamentu "Women on Wheels" ba kandidatu trabalhador feto na’in 500 iha Programa PALM nian sistema Work Ready Pool. Treinamentu ne'e sei fasilita husi kompania Monrique Reis Madeira Pty Ltd (MRM) durante fulan 6.

Inisiativa ida ne'e parte ida husi komitmentu Governu Timor-Leste no Austrália nian atu prepara kandidatu traballador Timor-oan sira, liu-liu prepara kandidatu traballador feto sira liu-husi hasa’e sira nia koñesimentu no abilidade kona-ba konduz kareta nian hodi bele responde ba merkadu traballu husi empregador aprovadu sira iha programa PALM nian iha futuru, inklui mós promove igualdade gêneru no empodera feto nia partisipasaun iha programa PALM.

Iha serimónia ida ne'e, marka prezensa husi Diretor Jeral SEFOPE, parseiru xave sira hanesan Diretor Jeral SEI, reprezentante husi Diresaun Nasional Transporte Terrestre, Embaixada Austrália, no senador na’in 9 husi Austrália.

Iha diskursu, reprezentante SEFOPE hato’o ninia mansajen apresiasaun no esteitmentu xave sira:

"Orgullu tebes tamba Prezidente Senadór husi Austrália nia komitmentu atu kontinua hametin koopersaun ho Governu Timor-Leste liu husi SEFOPE iha Programa PALM."

"Apresiasaun boot ba Embaixada Austrália, DFAT, no PLMSP ne'ebé servisu besik ho SEFOPE iha kapasitasaun rekursu umanu atu servisu iha rai-liur. Treinamentu sira ne'ebé ita hala'o dadaun nudar pasu importante atu progresu trabalhadora Timor-oan husi unskill ba iha skill."

"Parabéns ba kandidata feto sira ne'ebé sei partisipa iha formasaun ida ne'e durante fulan 6. Hau fiar imi bele aproveita didiak momentu ida ne'e atu aprende ho máximu matéria sira ne'ebé imi sei hetan husi fasilitador. La'ós de'it oinsá konduz kareta, maibé mós oinsá domina sinais tranzitu sira hodi garante seguransa bainhira konduz kareta iha Australia. Skill sira ne'e importante tebes atu ajuda imi bele performa ho diak liu bainhira imi hetan oportunidade servisu iha Austrália," dehan Diretor Jeral.

Aleinde diskursu husi Diretor Jeral, reprezentante Governu Austrália mós fó apresiasaun ba Governu Timor-Leste liu husi kolaborasaun SEFOPE ne'ebé proativu tebes, hodi lori programa ida ne'e sai susesu no iha benefísiu mutua ba povu Timor-Leste no Austrália.