DILI – Sekretaria Estadu Formasaun Profisionál no Empregu (SEFOPE) liu husi Unidade LSU iha Diresaun Nasional Empregu Estranjeiru (DNEE) hala'o formasaun lideransa durante loron 4 iha semana ida ne’e ba kandidatu no traballador retornu ba programa PALM nian hamutuk na’in 24.

Iha abertura treinementu refere hetan partisipasaun husi Diretor Interinu DNEE Sr. Alarico Fernandes no Primeira Sekretaria Embaixada Australia Sr. Kalo Tafolo.

Governu liu husi DNEE hamutuk ho DFAT nafatin buka dalan atu apoiu traballador sira hodi bele susesu iha programa PALM. Ida ne'e inklui mós formasaun lideransa ne'ebé ita-boot sira aprende dadaun. Inisiativa ida ne'e atu empodera ita-boot sira nia abilidade lideransa, laós deit iha programa PALM maibé mós bele ajuda imi aplika iha sosiedade. Ami iha esperansa boot katak depois treinamentu ida ne'e, ita-boot sira bele sai lider ne'ebé representativu no inkluzivu hodi bele ajuda apoiu sustentabilidade partisipasaun bamaluk traballador Timoroan sira seluk programa PALM." Dehan Diretor Interinu.

Inisiativa ida ne'e ajuda hakle'an ona kapasidade lideransa ba líder traballador no kandidatu sira, liuliu atu bele garante ben-estar traballador sira iha kampu, jestaun konflitu, no komunikasaun efikaz ho maluk traballador no empregador sira.

Iha loron ikus husi treinamentu loron 4 ne'e, partisipante sira partisipa mós iha sesaun ne'ebé fasilita husi The Asia Foundation. Sesaun ne'e foku ba asuntu Violénsia Bazeia ba Géneru (GBV). Inisiativa ida ne'e ajuda reforça prioridade segurança no ben-estar ba traballador sira hotu.

Sesaun ida ne’e ne'e reflete komitmentu kontinuidade husi Governu Timor-Leste no Austrália atu garante katak traballador Timor-oan sira simu apoiu no protesaun adekuadu durante sira-nia jornada servisu iha Australia nian.