Ministériu Asuntu Kombatentes Libertasaun Nasionál (MAKLN), liuhosi Tékniku Baze dadus Diresaun Nasionál bá Pensaun no Subvensoens (DNPS), iha loron 15 fulan-Dezembru tinan kotuk (2025) halo ona abertura pagamentu pensaun veteranus faze-primeiru bá benefisiáriu sira hamutuk 15,697. Pagamentu ida-ne’e finaliza ona sein-pursentu (100%) iha marsu foin lalais.

Nune’e, iha Segunda-feira, ohin, loron 27 fulan-Abríl 2026, MAKLN kontinua realiza pagamentu pensaun veteranus faze-segundu bá Benefisiárius hamutuk rihun-tolu, atus-tolu, sia-nulu-resin ida (3,391), iha Comoro-Dili.

Benefisiáriu rihun-tolu resin ne’e mai hosi Kombatente sira ne’ebé Rejistadu iha segundu rejístu tinan 2009.

Hosi totál 3,391 ne’e Munisipiu Aileu hamutuk ema na’in-210, Munisipiu Ainaro na’in-229, Munisipiu Baucau na’in-321, Munisipiu Bobonaro na’in-242, Munisipiu Covalima na’in-238, Munisipiu Dili na’in-764, Munisipiu Ermera na’in-283, Munisipiu Lautem na’in-193, Munisipiu Likísa na’in-212, Munisipiu Manatuto na’in-127, Munisipiu Manufahi na’in-176, Munisipiu Oecussi na’in-9, Munisipiu Viqueque na’in-152, Fora hosi Timor-Leste (iha Diáspora) hamutuk na’in-19.

Sira ne’ebé sei simu kada fulan hamutuk 1,274 (pensaun sobrevivénsia, pensaun subsisténsia ho pensaun espesiál reforma), sira ne’ebé simu dala-da de’it (Prestasaun Pekuniária Únika – 3 á 7) hamutuk 870, no sira ne’ebé atu simu Apoiu Finanseiru Úniku rihun $10, simu dala-ida de’it hamutuk 1,247.

Mekanizmu sira atendimentu nian hodi atribui fixa pagamentu ne’e tenke liuhosi dalan-ida de’it. Katak, benefisiáriu hotu-hotu ne’ebé atu foti sira-nia osan, ka sira-ninia inan ka aman ninia pensaun, tenke mai hotu iha DNPS Nasionál hodi atualiza dadus iha Sistema. Mekanizmu ida-ne’e halo hodi evita falsifikasaun no asegura katak, osan ne’ebé Estadu no Governu atu atribui, tenke bá duni ema ne’ebé Loos.

Tuir oráriu, atribuisaun fixa pagamentu ne’e, hahú uluk hosi Aileu 27 Abríl 2026, tuir fali Ainaro 28 Abríl 2026, Baucau 28 to’o 30 Abríl 2026, Bobonaro 1 Maiu 2026, Covalima 04 Maiu 2026, Dili 05 to’o 07 Maiu 2026, Ermera 08 Maiu 2026, Lautem 11 Maiu 2026, Liquiça 12 Maiu 2026, Manatuto 13 Maiu 2026, Manufahi 14 Maiu 2026, Oecussi 15 Maiu 2026, Viqueque 18 Maiu 2026, no ikus-liu mak sira ne’ebé fora hosi Timor-Leste hahú iha loron 19 Maiu 2026.

Ho nune’e, MAKLN kontinua fó hanoin Benefisiáriu 3,391 ne’ebé atu foti fixa pagamentu iha 27 Abríl ne’e, tenke la’o tuir oráriu ne’ebé mak estabelese ona tuir kada munisipiu, hodi nune’e evita ema sena-malu.

Enkuantu, tuir dadus, pagamentu pensaun bá Veteranus hosi 2008 mai to’o 2026, Governu selu tiha ona bá ema hamutuk 44,671 ho kategória Pensaun Sobrevivénsia, Pensaun Subsisténsia ho Pensaun Espesiál Reforma. Enkuantu, sira ne’ebé simu Pensaun ho kategoria Prestasaun Pekuniária Únika – 3 á 7 hamutuk 25,504, no Sira ne’ebé simu pensaun iha kategória Apoiu Finanseiru Úniku $10 – simu dala-ida de’it, hamutuk 798.

(𝐌𝐞́𝐝𝐢𝐚 𝐆-𝐌𝐀𝐊𝐋𝐍)