𝐕𝐞𝐦𝐚𝐬𝐬𝐞 – 𝐁𝐚𝐮𝐜𝐚𝐮, 𝟐𝟒 𝐀𝐛𝐫𝐢𝐥 𝟐𝟎𝟐𝟔

Empreza Australiana Tivan Limited sei halo prospesaun no peskiza ba mineral metáliku hanesan riti mean no osan mean iha bloku tolu ne’ebé pertense ba Postu Administrativu Vemase no Venilale, Munisípiu Baucau no suku balun husi Postu Administrativu Ossu, Munisípiu Viqueque.

Investimentu ne’e hanesan kontinuasaun husi peskiza anterior husi Australiana Beacon Minerals duante tinan rua, ho atividade kultural no mapeamentu, maibé Beacon labele kontinua tanba kestaun interna ne’ebé insiste empreza atu reitra husi projetu. Tivan Limited manifesta interesse atu kontinua peskiza, ho baze ba peskiza inisiál ne’ebé konfirma possibilidade rezerva osan mean no riti mean iha área konsesaun ne’ebé atribui husi governu.

Iha serimónia atribuisaun lisensa direitu mineiru iha Sexta-Feira ne’e iha Postu Administrativu Vemasse, Señor Prezidente Autoridade Nasionál Minerais, ANM, I.P., Rafael Magno tenik katak, iha faze prospesaun no pekiza, sei rezulta kriasaun empregu ho eskala ki’ik no waihira relatóriu ne’ebé empreza sei aprezenta ba governu iha tinan hirak mai mak sertifika rezerva husi riti mean no osan mean, mak governu sei hola desizaun hodi autoriza ba faze explorasaun ne’ebé iha futuru sei rezulta kriasaun empregu barak, inklui estimula ekonomia lokál no nasionál.

Ba Señor Diretur Exekutivu husi Tivan Limited, dezempeñu servisu dezde tinan 2025 manifesta eselénsia téknika no kriasaun ekipa ne’ebé forte no dedikadu. Servisu ne’evé mak sei realiza atividade oi-oin hanesan, prospesaun, avaliasaun, rekolla dadus siéntifiku no rekolla amostra ne’ebé prosesu hotu supreviziona husi ANM, I.P., no atividade hotu sei konta ho koolaborasaun husi entidade hotu.

Sua Eselénsia Ministru Petróleu no Rekursus Minerais, Francisco da Costa Monteiro tenik katak, investimentu iha setór mineral, hanesan esforsu atu komplementa atividade ekonómiku, além de setór petróleu ne’ebé Timor-Leste depende maka’as iha tinan barak nia laran. Governu kontinua tau atensaun maka’as, ho lansamentu prosesu tendér ba bloku esplorasaun foun iha tinan ida ne’e, hafoin ANM, I.P. intensifika promosaun ba potensialidade iha rai-liur, ho objetivu, atu dudu investimentu setór naun petrolíferu ne’ebé bele tulun dezenvolvimentu ekonómiku.

Hodi garante susesu husi projetu ne’e, Sua Eselénsia Ministru Petróleo no Rekursus Minerais, Señor Prezidente ANM, I.P., no Reprezentante Autoridade Munisípiu Baucau apela ba autoridade lokál husi Vemasse, Venilale no Ossu, atu hatutan ba populasaun hodi koopera no labele halo impedimentu, hodi tulun empreza Tivan Limited atu halo mapeamentu no foti amostra hodi submete ba análize laboratóriu. Apela mos akompañamentu husi lia na’in no autoridade lokál hodi Indika fatin lulik ne’ebé bandu atu book, hodi inklui iha mapeamentu.

Tivan Limited mos responsável ba propesaun no peskiza hodi ba osan metan, riti mean, iha área konsesaun ne’ebé pertense ba Postu Administrativu Venilale, Munisípiu Baucau no Munisípiu Viqueque no Postu Administrativu Turiscai, Same, Fatuberliu no Alas iha Munisípiu Manufahi, Postu Administrativu Maubisse, Munisípiu Ainaro no Postu Laclubar iha Munisípiu Manatutu.