Betano, 24 Abril 2026 – Sekretáriu Estadu Kooperativas (SEKoop), Eng. Arsénio Pereira da Silva, hamutuk ho Prezidenti Autoridade Munisipál Manufahi, Luís Marçal da Costa Tavares, halo koilleta Bafo Kayrala iha área hektare 4 resin iha Suku Betano. Atividade ne’e mos sai hanesan parte husi lansamentu nível munisipál iha Manufahi.

Iha intervensaun, Sekretáriu Estadu Kooperativas agradese ba produtór sira ne’ebé kontinua esforça atu produz Bafo Kayrala no produtu seluk. Nia hateten katak iha tinan 2026, total área kultivasaun Bafo Kayrala iha territóriu tomak to’o ona hektare 198, no hatudu rezultadu di’ak tanba hetan apoiu husi peskizador sira, funsionáriu tekniku no produtór sira iha Sentru Integradu.

“Komoditi ida-ne’e iha valór ekonómiku boot, di’ak ba konsumu ema nian no residu sira bele uza ba aihan animal. Nune’e mos, iha valor nutrisaun ne’ebé importante, no sei kontinua halo promosaun iha munisípiu no eskola sira, inklui posibilidade atu integra iha programa merenda eskolar,” hateten nia.

Nia mos akresenta katak Bafo Kayrala bele sai alternativa importante ba aihan tanba bele kultiva iha tempu no fatin oin-oin, no kuda dala ida bele koilleta dala tolu tuir kondisaun rai.

Iha tempu hanesan, Prezidenti Autoridade Munisipál Manufahi husu ba Grupu NABEHOT (Naroman Ba Ema Hotu) atu jere ho di’ak orsamentu ne’ebé simu ona husi Governu liu husi programa transferénsia públiku iha tinan 2025, atu garante sustentabilidade iha futuru.

Nia mos hato’o parabéns ba grupu refere ne’ebé konsidera hanesan ezemplu di’ak ba grupu agrikultura sira seluk iha Manufahi, liu husi servisu hamutuk ho autoridade munisipál atu hasa’e produtividade agrikola.

Sentru Produsaun Kooperativa Betano iha área total hektare 4,5, ne’ebé kultivadu husi Grupu NABEHOT ho akompañamentu husi Universidade Oriental Timor Lorosa’e. Iha sentru ne’e, halo teste ba variedade Bafo Kayrala hamutuk 6, inklui Mutin Bokar, Metan Bokar, Mutin Makerek Lotuk, Mutin Lotuk, Mean no Mean Makerek.

Maneira kuda uza distánsia hanesan 75x25 cm to’o 75x100 cm, no tempu koilleta normal mak fulan rua semana rua depois husi kuda.

Seremónia ne’e marka prezensa husi Diretór Nasionál Produsaun, Diretór Nasionál Delegasaun Munisipál, Komandante PNTL Eskuadra Same, reprezentante lideransa lokal, estudante sira no peskizador sira.

Atividade ne’e hatudu komitmentu Governu no parseiru sira atu dezenvolve setor agrikultura, hasa’e produtividade no melhora moris komunidade iha Munisipiu Manufahi.

#Média SEKoop#