Dili, 24 Abril 2026 - Sekretaria Estadu Komunikasaun Sosiál (SECOMS) sai ho pozisaun firme hodi rejeita notísia ne’ebé publika husi portal media balun iha loron 23 Abríl 2026, ne’ebé konsidera hanesan tentativa hodi kria persepsaun negativa no distorse realidade kona-ba akompañamentu Sekretáriu Estadu ba Primeiru-Ministru.

SECOMS afirma katak akompañamentu Sekretáriu Estadu, Expedito Dias Ximenes, ba Primeiru-Ministru Kay Rala Xanana Gusmão nu’udar knaar institusionál legítimu, ho objetivu klaru atu asegura informasaun Governu nian to’o ba públiku ho transparénsia no objetividade.

Tuir komunikadu imprensa ne'ebe Smnews asesu komfirma katak, akompañamentu mak parte husi responsabilidade Ofisial.

Afirma komunikadu ne'e katak, SECOMS prezensa Sekretáriu Estadu iha viajen sira, tantu rai-laran no rai-li’ur, halo parte husi mandatu ofisial komunikasaun Governu nian, la’ós iniciativa pesoál ka ilegal hanesan ne’ebé tenta hato’o.

SECOMS Akusa Falta Interpretasaun no “Narrativa Tendensioza” hodi manifesta lamentasaun katak media balun interpreta sala liafuan Primeiru-Ministru, ne’ebé, tuir SECOMS, tenke komprende iha kontextu krítika ba sistema no la’ós ba legalidade viajen sira.

SECOMS konsidera katak notísia ne’e halo “talking news” ne’ebé selektivu no subjektivu.

Media Lakon Prinsípiu “Cover Both Sides”

SECOMS mós destaca katak antes publika notísia, la iha tentativa kontaktu ofisiál hodi husu esklaresementu, ida ne’ebé kontra prinsípiu étika jornalístika kona-ba verifikasaun faktu.

Relasiona ho alegasaun kona-ba utilizasaun osan públiku, SECOMS afirma katak alegasaun USD 5,000 no USD 50,000 lalos no laiha baze

Utilizasaun orsamentu tuir rigor Dekretu-Lei nú. 41/2025

Despeza hotu monitoriza no verifika ona husi Ministériu Finansas

Dokumentasaun komprovativu kompletu iha

Apelu Ba Media: Liberdade La Signifika

Distorsaun

SECOMS bolu media hotu atu respeita étika no profesionalizmu, hateten katak liberdade imprensa la’ós lisensa hodi kria narrativa ne’ebé bele konfuze públiku.

SECOMS reafirma nia kompromisu atu kontinua kolabora ho media sira ne’ebé valoriza verdade, transparénsia no objetividade, hodi fó informasaun ne’ebé saudável ba sidadaun sira.