Manufahi, 25 abríl 2026 - Sua Exelénsia Ministra Edukasaun Dra.Dulce de Jesus Soares ho Prezidente Autoridade Munisípiu Manufahi Sr. Luis Marçal da Costa Tavares partisipa iha aprezentasaun rezultadu teste EGRA (Early Grade Reading Assessment) no EGMA (Early Grade Mathematics Assessment) ne'ebé ekipa pedagójika husi Ministériu Edukasaun halo ba estudante sira iha eskola hotu iha munisipiu Manufahi.

Iha abertura, Sua Exelénsia Ministra Edukasaun Dra.Dulce de Jesus Soares informa, ohin aprezenta rezultadu ida husi mini-teste ne'ebé ekipa pedagójika halo ba estudante sira iha klase ida to'o tolu husi eskola hotu iha munisípiu Manufahi.

"Ministériu Edukasaun estabelese ekipa pedagójika ida kompostu husi kurríkulu, INFORDEPE no Ensinu Báziku ho objetivu atu teste ida ba estudante klase ida to'o tolu hodi haree sira-nia koñesimentu ba literasia no númerasia", tenik Ministra.

Governante ne'e argumenta, Teste ida-ne'e foin dahuluk halo iha Timor-Leste no úniku mós iha mundu tanba bainhira ema halo teste ba estudante sira liuhusi sampel deit maibé ita-nia ekipa pedagójika la'o ba munisípiu hotu no halo teste ba estudante ida-idak.

Iha sorin seluk, Prezidente Autoridade Munisípiu Manufahi Sr. Luis Marçal da Costa Tavares aprofunda, bainhira koalia kona-ba edukasaun ne'e exijénsia Estadu nian la'os ema ida nian de'it tanba edukasaun maka baze fundamentál ba konstrusaun estadu no nasaun.

" Ita koalia kona-ba edukasaun, ita koalia kona-ba siénsia, dezenvolvimentu pesoál, étika, morál nomós oinsá atu serví povu no nasaun. Tanba ne'e mak ita hatete edukasaun ne'e exijénsia estadu ida nian", PAM Esplika.

Nune'e iha aprezentasaun ne’e hetan Partisipasaun husi Prezidente Autoridade Munisipiu Manufahi Sr. Luis Marçal da Costa Tavares, Diretora Servisu Edukasaun Munisípal Sra. Joaninha da Silva Soares, Vise - Prezidente Sra. Domingas Belo Amaral Mendes, Ekipa pedagójika, Mentor, Diretór no koordenadór Eskola sira iha munisipiu Manufahi.

#EliasdaCosta

#MédiaME