Sua-Exelénsia Ministru Asuntu Kombatentes Libertasaun Nasionál (MAKLN), 𝐆𝐢𝐥 𝐝𝐚 𝐂𝐨𝐬𝐭𝐚 𝐌𝐨𝐧𝐭𝐞𝐢𝐫𝐨 “𝐎𝐚𝐧-𝐒𝐨𝐫𝐮”, atualiza bá públiku, relativamente ho prosesu pagamentu pensaun veteranus faze segundu nian bá ema ka benefisiáriu hamutuk 3,391 ne’ebé hahú ohin, halo ona atribuisaun fixa pagamentu.

“Ema totál ohin ami halo pagamentu bá Segunda-faze ne’e, horibainhira ha’u hatete tiha ona bá públiku, ema hamutuk rihun-tolu, atus-tolu, sia-nulu resin-ida (3,391). Hosi totál ida-ne’e, sira barak liu mak simu ida Apoiu Finanseiru Úniku $100, sira ne’e mak hamutuk 1,236. Pensaun Sobrevivénsia hamutuk 1,021. Sira ne’ebé simu pensaun ho Kategória 8 á 14, mais ho ninia kapasidade servisu labele ona, hamutuk ema na’in-34. Pensaun 8 á 14 hamutuk 112. Pensaun Espesiál Reforma ema na’in-ida. Sira ne’ebé simu Prestasaun Pekuniária Únika (PPU – 3 á 7), hamutuk 872,” S.E Ministru “Oan-Soru” informa bá Jornalista sira liuhosi konferénsia imprénsa, ohin, Segunda (27/04/2026).

Governante ne’e esplika, uainhira benefisiáriu sira ne’e foti ka simu tiha sira-nia fixa pagamentu nian, bele lori bá banku ne’ebé sira loke ona kanta-bankária, hodi halo levantamentu bá sira-nian osan (pensaun).

MAKLN kontinua apela bá inan-aman veteranus sira no husu liu-liu bá família sira ne’ebé atu akompaña sira-nia inan-aman, kumpri nafatin oráriu kada munisipiu ne’ebé estelebese ona.

Enkuantu, hatán kona-bá “Prosesu no Desizaun bá dadua Veteranus 61,711 ne’ebé tama iha reklamasaun no kontestasaun”, Ministru Asuntu Kombatentes Libertasaun Nasionál ne’e dehan, fulan-Maiu mai oin mak kontinua fila-fali bá halo desizaun.

Desizaun sira kona-bá Rekursu ne'e, sei deside hosi responsável rezisténsia sira hamutuk na’in-ualu, no sei hetan mós akompañamentu hosi ekipa tékniku baze dadus iha kada munisipiu sira.

(𝐌𝐞́𝐝𝐢𝐚 𝐆-𝐌𝐀𝐊𝐋𝐍)