Asuntu : 𝐓𝐈𝐌𝐎𝐑 𝐆𝐀𝐏 𝐍𝐎 𝐇𝐓𝐒 𝐄𝐗𝐏𝐋𝐎𝐑𝐀𝐓𝐈𝐎𝐍 𝐋𝐓𝐃 𝐒𝐄𝐈 𝐊𝐎𝐎𝐏𝐄𝐑𝐀 𝐈𝐇𝐀 𝐄𝐗𝐏𝐋𝐎𝐑𝐀𝐒𝐀𝐔𝐍 𝐏𝐄𝐓𝐑𝐎𝐋𝐈́𝐅𝐄𝐑𝐀 𝐈𝐇𝐀 𝐀̀𝐑𝐄𝐀 𝐕𝐈𝐐𝐔𝐄𝐐𝐔𝐄 𝐃𝐢́𝐥𝐢, 𝟏𝟐 𝐒𝐞𝐭𝐞𝐦𝐛𝐫𝐮 𝟐𝟎𝟐𝟓 TIMOR GAP, E.P., sei partisipa iha explorasaun petrolífera iha área rai maran (onshore) iha àrea konsesaun PSC-TL-OT-22-22 entre área Beasu to’o Ailembata, Munisípiu Viqueque, hamutuk ho kompaña husi HTS Exploration LTD, husi Kazakistaun ne’ebé assina ona kontratu konsesaun ho ANP, I.P. , iha loron 7 fulan Marsu tinan 2024. Partisipasaun empreza estatal ne’e ho pursentu 10, liu-husi akordu ne’ebé assina husi TIMOR GAP no ANP, I.P. ne’ebé testemuña husi Sua Eselénsia Ministru Petróleu no Rekursus Minerais, Francisco da Costa Monteiro no ekipa HTS lidera husi Señora CEO HTS Exploration LTD, Aizhan Ismailova liu-husi virtuál. Señor Prezidente ANP, I.P., Gualdino do Carmo da Silva tenik katak, partisipasaun TIMOR GAP, E.P., iha indústria petrolífera hamutuk ho investidór sira, bazeia ba lejislasaun kona-ba atividade petrolífera. Durante atividade peskiza, TIMOR GAP, E.P., sei la halo despeza ruma, maibé entidade rua sei halo diskussaun waihira tama ona ba faze komersializasaun, hafoin konfirma ninia potensialidade no viabilidade komersiál. Hafoin assinatura akordu, TIMOR GAP, E.P. no HTS Exploration LTD sei deskuti dokumentu Joint Operation Agreement – JOA ne’ebé kobre aspetu legál, téknika, finanseira no lojístika, hodi assegura koordenasaun, operasaun no implemetasaun iha futuru no dokumentu ne’ e tenke hetan aprovasaun husi ANP, I.P., hanesan autoridade reguladora ba atividade petrolífera. Ba Señor Vise Prezidente TIMOR GAP, E.P., Domingos Lequi-Siga, entidade estatal ne’ e sei envolve ativamete iha aspetu tékniku durante faze peskiza no perfurasaun, maibé despeza tomak sei responsabiliza husi HTS Exploration LTD. Sua Eselénsia Ministru Petróleu no Rekursus Minerais, Francisco da Costa Monteiro kongratula HTS Exploration LTD no TIMOR GAP, E.P., ne’ ebé hanesan reprezentante estadu iha atividade petrolífera no partisipasaun entidade estatál ne’e. hanesan pasu markante ida hafoin assinatura akordu iha tinan 2024. Elojia mos HTS ne’ ebé maske ho distánsia do’ok, hili Timor-Leste hanesan destinasaun ba investimentu no espera katak, explorasaun petrolífera ne’ e sei iha rezultadu pozitivu. Ba Sua Eselénsia Ministru, explorasaun iha rai maran hanesan iha Viquque konsideradu rekursu potensiál, ne’ ebé ho expetativa katak, bele kontribui reseitas ba estadu iha kurtu ka médiu prazu no dudu atividae ekonómika iha Timor-Leste. Governu mos kontinua aposta ba kriasaun fasilidade iha Kosta Súl no infraestruturas estratejika sira, hodi kontribui ba mobilizasaun ba área xavi sira ne’ ebé konekta atividade petrolífera. HTS ne’ebé selesionadu husi prosesu ne’ebé inisia iha tinan 2019, hanesan empreza espesializada iha explorasaun no produsaun mina-rai no gas no sai na’in ba kampu balun iha Kazakistan no mos fornese servisu explorasaun no produsaun balun iha rejiaun. REMATA
Data Publica : 15 Sep 2025
Descrisaun :
