Dili, 29 abríl 2026 - Ministériu Edukasaun, liuhusi Komisaun Nasionál Timor-Leste ba UNESCO ho servisu hamutuk ho Diresaun Ensinu Báziku no Ensinu Sekundáriu, halo nomeiasaun Grupu Estudante nain Sanulu hodi partisipa iha International Creativity and Innovation Award (ICIA) iha Cambodia. Grupu estudante sira ne’e balu partisipa liuhusi online no balu prezensiál.

Grupu Estudante husi Ensinu Báziku sira maioria husi Eskola Publika hanesan Grupu rua husi Ensino Basico Central 1, 2 no 3 siklu Dom Baumeta, Aileu ne’ebé konsidera iha área remotas. Grupu ida husi EBC 3 Fatumeta Dili. Grupu Rua husi EB Catolica St. Antonio Teulale Baucau.

Estudante husi Ensinu Sekundáriu hotu-hotu, husi Ensinu Sekundáriu Públiku mak hanesan, grupu 1 husi Ensinu Sekundáriu Geral Publiku 4 de Setembru Viqueque, Grupu ida husi ESGP No. 1 Liquiça, Grupu ida husi ESGP Finantil Dili, Grupu ida husi ESGP No.1 Baucau Vila.

Kompetisaun ne’e hetan partisipasaun masímu husi nasaun hamutuk 27 (Amérika Latina, Europa, Ázia, no Médiu Oriente)

1. Partisipasaun Online (Realiza iha 11 de Abríl 2026)

Kategoria ne’e partisipa husi nasaun 14 mak hanesan: Ejiptu, Jordánia, Síria, Irake, Iraun, Iémen, Turkia, Marroko, Itália, Roménia, Meksiku, Bolívia, Ekuadór no Brazíl, Timor-Leste.

2. Partisipasaun Direta (Onsite)

Kompetisaun direta (onsite) ne’e hetan partisipasaun husi nasaun 13 hanesan: Cambodia, Timor-Leste, Tailándia, Filipinas, Indonézia, Vietname, Malázia, Laos, Bangladés, Índia, Sri Lanka, Japaun, no Pakistaun

Partisipasaun Timor-Leste nian fahe ba kategoria rua:

1. Partisipasaun Online (Realiza iha 11 Abríl 2026)

Iha kategoria ida-ne’e, Timor-Leste kompete hamutuk ho nasaun sira hanesan Ejiptu, Jordánia, Turkia, Itália, Roménia, Méksiko, no Brazíl. Reprezentante sira mai husi eskola tuirmai ne’ebé konsege manán Medalla Osan Mutin (Silver) Tolu no Medalla Bronze tolu:

• ESGP Nú. 1 Baucau – Medalla Osan-Mutin (Silver)

• ESGP Nú. 1 Likisá - Medalla Osan-Mutin (Silver)

• ESGP Finantil Dili - Medalla Bronze

• ESGP 4 de Setembru Viqueque - Medalla Osan-Mutin (Silver)

• EBC Dom Baumeta 1, 2, 3 Suku Liurai, Aileu-Vila - Medalla Bronze

• EBC 3 Fatumeta Dili - Medalla Bronze

2. Partisipasaun Direta (Onsite)

Timor-Leste marka istória foun liuhusi susesu boot iha partisipasaun direta ka onsite iha Cambodia. Nasaun hirak ne’ebé partisipa maizumenus 27. Ikusmai Timor konsege hetan rezultadu hanesan tuirmai:

• EB Catolica St. Antonio Teulale Baucau ho projetu “Estatístika Husi Resiklajen Oinsá Atu Buka Moda, Mediana No Média Husi Sasán Garaffa Matan, Paulitu Ai-Kesak No Gabus,” manán prémiu ho kategoria Grand Award, Titanium, no Top 10 Challenge-Ministru Ambiente Cambodia.

• Grupu rua seluk hanesan EBC Dom Baumeta 1, 2, 3 Suku Liurai, Aileu-Vila ho projetu “Bioplastiku Ne'ebé Halo Iha Uma: Bikan/Kopi Ho Manu-Tolun Nia Kulit,” manán Medalla Osan-Mutin (Silver) no EB Catolica St. Antonio Teulale Baucau ho projetu “Sekuénsia Númeru Mosu Iha Tais” manán Medalla Bronze.

• Prémiu ba Manorin; Timor-Leste mós hetan rekoñesimentu boot liuhusi Grand Award Top 3 "Teach Me Award", ne’ebé atribui ba Manorin Zelia Alves da Cruz husi EBC Dom Baumeta 1, 2, 3 Suku Liurai, Aileu-Vila, ba kapasidade hodi esplika konseitu kompleksu sira ho modu simples no edukativu inklui kbiit komunikasaun no pedagójika ne’ebé diak tebes hodi hanorin fali ema seluk kona-ba sira nia inovasaun.

#EliasdaCosta

#MédiaME