Prosesu selesaun ida-ne’e hala’o entrevista ho objetivu atu halo asesmentu ba kandidatu sira-nia abilidade ho komunikasaun iha lian Inglés, tuir rekezitus no padraun ne’ebé kompañia determina.

Iha sesaun rekrutamentu ida-ne’e, reprezentante husi DNEE–LSU marka prezensa hodi asegura katak prosesu selesaun la’o ho dalan ne’ebé organizadu, justu, no transparente. Iha tempu hanesan, sira mos fasilita koordenasaun entre empregadór ho kandidatu sira durante prosesu selesaun.

Atividade rekrutamentu ida-ne’e hatudu komitmentu husi SEFOPE–DNEE atu expanda oportunidade servisu iha rai liur ba Timoroan sira liuhusi Eskema PALM. Inisiativa ida-ne’e sei kontribui dezenvolve abilidade traballadór sira-nian, hadi’a kondisaun ekonómia família, no fó impaktu pozitivu ba dezenvolvimentu ekonomia nasaun, bainhira kandidatu sira selesionadu hodi ba servisu iha Australia.

Nu'udar Empregadór Aprovadu (AE) akreditadu ne'ebé partisipa iha eskema Mobilidade Traballu Pasífiku Austrália nian (PALM) durante dékada ida liubá, TeamsWork sente orgullu tebes ho traballador timor oan nian partisipasaun iha eskema ida-ne'e. TeamsWork simu ona traballadór atus ba atus husi Illa Pasífiku no Timor-Leste iha sira nia rejiaun, TeamsWork hanesan parseiru di'ak bainhira atu fornese ema ne'ebé loos ba serbisu iha vitikultura, ortikultura no ospitalidade.

Programa PALM iha papél signifikativu ida hodi haburas progresu no seguransa ekonómika ba nasaun sira Pasífiku nian ne'ebé partisipa no Timor-Leste.

Liuhusi PALM, TeamsWork fornese ona ba traballadór sira ne'ebé iha abilidade no dedikadu hosi nasaun sira-ne'e ho oportunidade sira atu hetan esperiénsia esensiál no hetan rendimentu hodi suporta sira nia família no komunidade sira iha rai-laran.