Asuntu : 𝐊𝐎𝐌𝐏𝐀𝐍̃𝐀 𝐏𝐄𝐓𝐑𝐎𝐍𝐀𝐒 𝐄𝐗𝐏𝐋𝐎𝐑𝐀 𝐎𝐏𝐎𝐑𝐓𝐔𝐍𝐈𝐃𝐀𝐃𝐄 𝐇𝐎𝐃𝐈 𝐈𝐍𝐕𝐄𝐒𝐓𝐄 𝐈𝐇𝐀 𝐓𝐈𝐌𝐎𝐑-𝐋𝐄𝐒𝐓𝐄 𝐏𝐚𝐥𝐚́𝐬𝐢𝐮 𝐆𝐨𝐯𝐞𝐫𝐧𝐮, 𝟏𝟏 𝐒𝐞𝐭𝐞𝐦𝐛𝐫𝐮 𝟐𝟎𝟐𝟓 Sua Eselénsia Ministru Petróleu no Rekursus Minerais, Francisco da Costa Monteiro hamutuk ho Señor Prezidente ANP, I.P., Gualdino da Silva no Señor Vise Prezidente TIMOR GAP, E.P., Domingos Lequi-Siga akompaña Sua Eselénsia Primeiru Ministru, Kay Rala Xanana Gusmão hodi hasoru malu ho delegasaun husi kompaña Petrolífera Petronas husi Malázia, atu explora oportunidade hodi investe iha Timor-Leste. Señor Prezidente no CEO Petroliam Nasional Berhard (PETRONAS), Tengku Muhammad Taufik ne’ebé akompaña husi ninia antesesór Tan Sri Mohd Hassan Marican, agradese ba enkontru amigável no produtivu ho ekipa Xefe Governu, hodi explora oportunidade investimentu. Relasiona ho interesse husi Petronas, Sua Eselénsia Ministru Petróleu no Rekursus Minerais, Francisco da Costa Monteiro destaka papél desizivu husi antigu Prezidente no CEO Petronas, Tan Sri Mohd Hassan Marican iha indústria petrolífera no mos oferta formasaun no bolsa estudu ba timor-oan sira entre tinan 2002 to’o 2003, waihira Sua Eselénsia atuál Xefe Governu hanesan Prezidente Repúblika husi tinan 2002 to’o 2007. Sua Eselénsia Primeiru Ministru destaka prezensa Petronas dezde tinan 2002 to’o 2008 no kontribuisaun husi ekipa empreza ne’e ba realizasaun estudu iha Tasi Timor no sei dekuti detalladamente oportunidade investimentu hamutuk ho ANP, I.P. no TIMOR GAP, E.P.. Kontribuisaun ida husi Petronas mak pré-estudu viabilidade ba gazodutu mai Timor-Leste, hodi hetan dadus kredivel, forte no profissional kona-ba gazodutu mai Timor-Leste no dezenvolvimentu husi indústria petrolífera iha Kosta Súl. REMATA
Data Publica : 15 Sep 2025
Descrisaun :
