Baucau-seiçal, 27 Abríl 2026 – Ministru Agrikultura, Pekuária, Peska no Floresta (F-FDTL) lansa atividade kuda hare iha natar ektare neen (6) ho ekipamentu agríkola modernu ne’ebé organiza husi veteranu grupu Daitula iha suku Seiçal, Postu Baucau Vila, Munisípiu Baucau.

“Ohin ita ko’alia kona bá agrikultura, oinsá atu aumenta produsaun iha setór agrikultura, Peku’aria, Peska no Floresta. Tanba ne’e ohin ita mai iha ne’e atu introdúz bá nasaun involvimentu veternau sira nian, oinsá atu kontribu hodi aumenta produsaun iha rai laran. ” Dehan Ministru Marcos bá jornalista sira depois lansa atividade kuda hare iha Seiçal, Munis’ipiu Baucau Segunda ne’e.

Ministru Marcos MAMETA haktuir katak partisipasaun veteranu sira nian iha dezenvolvimentu bá setór agrikultura, Pekuária Peskas no Florestas ne’e tanba sira iha nafatin responsabilidade bá povu ne’e. uluk sira fó ona kontribusaun bá libertasaun patria durante tinan 24. sira hamutuk ho komandante boot sira no simu orientasaun hodi halo funu to’o liberta nasaun ne’e husi inimigu nia liman. Ohin kontente tebes haree veteranu sira ho idade avansadu ona, loloos sira dezkansa ona maibé sira sei nafatin hakarak servisu bá rai ida ne’e iha setór haat ne’ebé importante

“Ha’u hanesan ema ne’ebé responsavel bá area agrikultura, fó apresu boot bá aman sira ne’ebé sei nafatin hakarak kontribui bá dezenvolvimentu ita nia rai nian bá setór Agrikultura, Pekuária, Peska no Florestas. Ohin ita ko’alia kona bá setór agrikultura. Ita ko’alia mós kona-bá partisipasaun veteranus sira nia liuhosi aumenta produsaun”. Tenik Ministru

Tanba ne’e atu aumenta produsaun presiza mós hadia infrestrutura baziku mak hanesan irrigasaun. Membru Governu ne’e informa katak Iha area ne’e agora daudaun halo hela konstrusaun bá irrigasaun boot ida naran irrigasaun Uatuwa. ne’e tanba kontribuisaun husi aman veteranus sira nian inklui mós kontribuisaun autoridade no komunidade sira iha suku Samalari, Gariwai no Seiçal maka konstrusaun ne’e la’o hela, no buat hotu di’ak.

Ministru salienta liutan katak durante servisu sira ne’e la’o, parte Ministériu liuhusi tékniku sira kontinua funsiona kanal sira hodi fornese nafatin bee bá natar, atu komunidade agrikultór bele halo sira nia natar ho ekipamentu modernu hodi nune’e bele hakma’an todan no redús kustu operasionál. Ekipamentu modernu ne’ebé MAPPF apoiu ona bá agrikultór sira maka handstractor, mákina kuda hare no mákina koa hare.

Governante ne’e kontinua fó ninia apresiasaun bá aman veteranu sira ne’ebé to’o agora sei kontinua fó nafatin sira nia kontribuisaun. Lideransa MAPPF ne’e haree katak partisipasaun veternus sira nian iha setór agrikultura ne’e tanba sira haree situasaun agora ne’e, joven barak maka seidauk sente katak setór agrikultura fó benefisiu. Maibé ho involvimentu veteranu sira nian ne’e bele fó motivasaun.

“Ita husu bá joven sira hotu la’oos iha de’it Baucau maibé joven iha Timor laran tomak atu bele hahú tama iha natar hodi servisu atu hasa’e produsaun hare ho nune’e maka ita bele fó apoiu. Tanba ha’u simu ona sira nia proposta. Ne’e duni ha’u sei apoiu mákina 5 mak hanesan mákina koa hare unidade 1, mákina kuda hare unidade 2 no tractor unidade 2 bá sira”.

Serimónia lansamentu kuda hare ho ekipamentu agríkola modernu iha Seiçal ne’e hetan partisipasaun husi Peputadu sira, Prezidente Autoridade Munisípiu (PAM) Baucau, Komandante Polisía Munisípiu Baucau, Reprejentante FALINTIL-Forsa Defeza Timor-Leste (F-FDTL) Diretór Servisu Agrikultura Munisípiu Baucau, Xefe de Suku Seiçal Veteranu no Komunidade Agrikultór sira.