Dili, 29 Marsu 2026, Sekretáriu Estadu Formasaun Profisional no Empregu (SEFOPE), Sua Exelênsia Rogério Araújo Mendoça L.Ed, ofisiálmente loke Abertura ba Merkadu Baratu no Doasaun Ran, hodi selebra Loron Mundial Traballu, ne'ebé mak monu iha loron 1 fulan Maiu.

Atividade ida ne’e fó énfase ba tema “Hametin Dialogu Sosial liuhusi Negosiasaun Koletiva hodi Promove Traballu Dignu iha Servisu Fatin”.

Selebrasaun loron rua (29–30 Marsu) envolve:

• Parseria ho kompañia 17 ba bazar baratu, fó oportunidade ba komunidade no traballadór sira atu hetan produtu hosi presu aseitável.

• Serbisu hamutuk ho Ministériu Saúde hodi halo atividade doasaun ran ba komunidade.

Sekretáriu Estadu hateten katak kada tinan, loron 1 de Maiu mak loron mundial traballadór sira, ne’ebé konsidera hanesan heroi ekonomia dezenvolvimentu nasional.

“Kada tinan Sekretáriu Estadu Formasaun Profisional no Empregu (SEFOPE) hamutuk ho Konsellu Nasionál Traballu sempre selebra dia 1 de Maio hanesan loron mundiál ba traballadores sira, hanesan ita hatene katak traballadores sira mak sai hanesan Heroi ba ekonomia dezenvolvimentu nasional ida ne’e,” tenik Sekretariu Estadu.

Ba selebrasaun loron ohin, pontu prinsipál mak Fasilita bazar baratu ba traballadór sira no komunidade no Hametin preparasaun ba dia 1 de Maiu, loron mundial traballadór sira.

Atividade ne’e mos fó valorizasaun ba traballadór sira ne’ebé hetan vensimentu limitadu, hodi promove dignidade no solidariedade iha fatin servisu.