DILI, 30,04,2026 – Iha ambitu selebrasaun Loron Mundial Traballador, (SEFOPE) liu husi Diresaun Nasional Empregu Estanjeiru (DNEE) ho orgullu hala'o seremonia despedida ba traballador sira iha programa Pacific Australia Labour Mobility (PALM) nain 104 (Mane 66, feto 38) ne'ebé sei mobiliza ba servisu iha Australia hamutuk ho kompania sira hanesan, Windy berries, Quensaland Berries, Madec, Thomas Food, Top of the Crop.

Seremonia ne'e sai nu’udar parte importante hodi fó apoiu moral no orientasaun final ba traballador sira antes sira viajen ba rai seluk.

Iha seremonia ida ne'e, hetan partisipasaun husi Diretor Jeral Servisu Korporativus SEFOPE, Sr. Nelson Soares Carvalho, Diretor Nasional DNEE, Sr. João Correia Pereira, no mos delegasaun reprezentantes Governu Australia inklui mos familia sira husi traballador.

Alende hato’o politika Governu Timor-Leste no Australia nia komitmentu ba programa Mobilidade Laboral PALM atu hasae numeru trabllador ba to’o 10000 iha tinan sira tuir mai, inklui planu estabelisimentu sentru PLAM, Diretor Nasional Korporativus SEFOPE, Sr. Nelson Soares Carvalho, iha ninia diskursu fo mos mensagen importante ba trablladrores no familia sira katak:

“Hau apela ba traballador sira hotu: bainhira servisu iha Australia, tenke kumpri akordu sira ne'ebé imi halo ona, tamba ida ne'e sei ajuda loke dalan mos ba ita nia maluk Timor-oan sira seluk ne'ebé seidauk hetan oportunidade. Labele haluha mos katak ita boot sira presiza kria rasik imi nia planu investimentu ruma ba futuru hodi nune'e aban-bainrua imi bele sai mos hanesan empregador ida ne'ebé bele tulun ekonomia nasional inklui fo oportunidade servisu ba Timor-oan sira seluk ne'ebé presiza."

Nia hatutan:"Haksolok mos atu hare familia ‘sira ne’eb’e ohin loron hamrik iha traballador ida-idak nia sorin iha ambitu asina deklarasaun ne'ebé hanesan momentu importante ida atu kesi metin liu tan relasaun entre traballador, familia, inklui estadu, hau enfaze dalaida tan atu ita hotu komprimenta deit ba akordu ne’ebé ita halo hamutuk ."Ikus liu, husu ba ita boot sira atu nafatin kria relasaun no komunikasaun ne'ebé saudavel ho imi nia mamberu familia sira iha imi nia jornada hamutuk ho programa PALM.

SEFOPE reafirma, sei kontinua servisu makas ho parseiria sira buka nafatin oportunidade atu expanda oportunidade rekrutamentu iha futuru ida ne’e inklui mos planu hari sentru PALM no dezenvolvimentu skill trabllador sira nian ne’ebé halao dadaun.