𝐁𝐫𝐮𝐧𝐞𝐢 𝐃𝐚𝐫𝐮𝐬𝐬𝐚𝐥𝐚𝐦, 𝟎𝟑 𝐌𝐚𝐢𝐮 𝟐𝟎𝟐𝟔

==========================

Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, akompaña Primeiru-Ministru, Kay Rala Xanana Gusmão iha viajen ofisiál ba Brunei Darussalam.

Primeiru-Ministru ho delegasaun to’o iha Aeroportu Internasionál Bandar Sri Begawan simu hosi Xefe Protokolu Konsulares Brunei Darussalam, Mohamed Hazreen Patel ‘Dato Paduka Hj Masri ho Guarda Onra Militár, Brunei Darussalam nian iha aeroportu, nu’udar parte husi serimónia resepsaun ofisiál.

Nune'e mós Primeiru-Ministru ho delegasaun simu husi Prínsipe Haji Al-Muhtadee Billah hanesan Prínsipe Herdeiru (Crown Prince) ba rai Brunei Darussalam, nu'udar mós Ministru Senior iha Gabinete Primeiru-Ministru nian iha Brunei. Oan-mane primeiru husi Sultan Hassanal Bolkiah. Nia mós serví nu'udar Jenerál iha Forças Armadas Reais Brunei nian.

Delegasaun ne'e kompostu hosi Vise Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, Ministru Negósiu Estranjeiru no Kooperasaun (MNEK), Bendito dos Santos Freitas, Ministru Petróleu no Rekursu Minerál (MPRM), Francisco da Costa Monteiro, Ministra Saúde (MS), Elia Amaral, Vise Ministra Asuntu ASEAN, Milena Rangel, Sekretáriu Estadu Komunikasaun Sosiál, Expedito Dias Ximenes, Embaixadór TL iha Brunei, Abel Guterres no Xefe Gabinete Primeiru-Ministru, Elizabeth Exposto.