Dili loron 5, fulan-Maiu, tinan 2026, Sekretáriu Estadu ba Formasaun Profisionál no Empregu Sua Exelénsia Rogério Araújo Mendonça L.Ed, simu Empregador Mr Apples Sr. Gary Jones, ne'ebé mak hala'o rekrtutamentu ba Timoroan na'in 30, sei ba servisu iha nasaun Nova Zelândia.

Hafoin sorumutu Sekretáriu Estadu hateten, iha diskusaun ne'e empregadór Mr Apples komprometidu hala'o rekrtutamentu ba Timoroan sira, ba tempu badak no sei ba servisu iha area hortikultura.

"Ohin parte husi Empregadór Mr. Apples hateten ona katak, iha pilotu dahuluk nia sei halo rekrutamentu ba Timoroan na'in 30, ne'ebé mak sei ba servisu iha nasaun Nova Zelândia, iha Area hortikultura durante fulan hitu ou liu Sia, servisu ba tempu badak." Hateten Sekretáriu Estadu ba jornalista sira hafoin remata diskusaun, iha Salau VIP SEFOPE.

Sekretáriu Estadu fundamenta katak, numeru 30 ne'e, sei hala'o selekasaun ka filter ema atus ida resin, hafoin bele hatene se mak bele hetan oportunidade ne'e ho valor diak, mak bele liu hodi kompleta numeru 30 ne'e.

"Hau hanoin, hanesan ita hotu hatene katak, molok hetan sira nain 30 ne'e ita tenke teste ema liu atus ida ou liu mak foin hetan ema 30, ita filter ka teste rigerozu." Hateten Sekretáriu Estadu.

Aliende ne'e Sekretáriu Estadu akresenta katak, faze dahuluk sei hahu ho tempu badak no ba futuru sei esforu atu nune'e Timoroan sira ba servisu iha tempu naruk.

"Agora sira sei ba ho tempu badak, espera ba oun ita esforsu sira ba ho tempu naruk bele tinan rua ka liu ba tinan haat, hanesan ho uluk ita haruka Timoroan ba Austrália sira ba ho tempu badak, maibe agora sira balun ba tinan haat ka tempu naruk." Dehan Sekretáriu Estadu.

Hafoin remata sorumu Empregador ho ekipa SEFOPE liu husi DNEE, sei hala'o vizita ba Munisipiu Aileu, Ainaro no Baucau. Hafoin fila husi Munisípiu sira mak tama ba iha faze teste ba kandidatu sira, no iha teste ne'e empregadór rasik mak sei halo ba kandidatu sira.