𝐁𝐫𝐮𝐧𝐞𝐢 𝐃𝐚𝐫𝐮𝐬𝐬𝐚𝐥𝐚𝐦, 𝟒 𝐌𝐚𝐢𝐮 𝟐𝟎𝟐𝟔

=========================

Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato' Seri Francisco Kalbuadi Lay, akompaña Primeiru-Ministru, Kay Rala Xanana Gusmão, hala'o enkontru bilaterál no audiénsia ho Sultan Hassanal Bolkiah no família real iha Brunei Darussalam.

Iha enkontru bilaterál ne'e Liurai Brunei Darussalam, Sua Majestade Sultan Haji Hassanal Bolkiah Mu'izzaddin Waddaulah oferese almosu hamutuk ida ho delegasaun iha ne'ebé marka mós prezensa husi membru família reál nian.

Durante enkontru iha Istana Nurul Iman, Segunda, 4 Maiu 2026, Primeiru-Ministru hato’o apresiasaun bo'ot ba relasaun di’ak entre nasaun rua no elojia papél Brunei nian iha estabilidade rejionál.

“Relasaun entre ita-nia nasaun sira forte no bazeia ba amizade no respeitu mutuo. Ami-nia apresiasaun bo'ot ho ita-boot nia vizita bá Timor-Leste iha tinan 2024. Ne'e reflete forsa hosi lasu sira entre ita-nia nasaun no vontade di'ak entre ita-nia povu sira. Brunei Darussalam iha papél importante iha ita-nia rejiaun,"hatete PM Xanana Gusmão.

Governu Timor-Leste agradese ba apoiu Brunei Darussalam iha prosesu adezaun ba ASEAN, no reafirma kompromisu atu kontinua hametin kooperasaun ba dezenvolvimentu, estabilidade no prosperidade iha rejiaun.