𝐃𝐢𝐥𝐢, 𝟎𝟓 𝐦𝐚𝐢𝐮 𝟐𝟎𝟐𝟔 – Ministru Komérsiu no Indústria, Nino Pereira, hamutuk ho kargu dirijente no asesor sira, hasoru malu ho ekipa husi Banku Dezenvolvimentu Aziátiku (BAD) no konsultór internasionál sira hodi halo diskusaun kona-ba planu dezenvolvimentu urbanu no estudu viabilidade ba projetu sidade portu reziliente.

Sorumutu ne’e parte konsultor ADB halo aprezentasaun kona-ba relatóriu konsepsaun ba sidade portu reziliente ne’ebe sei propoin rezultadu tolu hanesan infraestrutura urbana reziliente ba klima no servisu báziku iha área sidade portuáriu Ulmera, Kapasidade institusionál no planeadu hametin regulatóriu ba dezenvolvimentu urbanu nomos enkuadramentu planeamentu integradu no fazeadu ba sidade portuáriu Ulmera–Tibar área ne'ebé prepara ona.

Governu Timor-Leste hala’o hela estudu asisténsia téknika (ADB-TA) atu orienta kriasaun distritu urbanu ida ne’ebé reziliente ba klima, ho servisu adekuadu no prontu ba investimentu, ne’ebé lokaliza iha korredór metropolitanu osidentál liga Dili, Tibar, no Ulmera.

Estudu ida-ne'e buka atu operasionaliza Portu Baía Tibar nu'udar portaun lojístika prinsipál nasaun nian, hodi aliña infraestrutura portu ho dezenvolvimentu urbanu, espansaun teritoriál, no atividade ekonómika. Objetivu maka atu transforma investimentu nasionál estratéjiku ida ba sistema urbanu-ekonómiku ida ne'ebé bele hamosu empregu, atrai investimentu privadu, no estrutura kreximentu metropolitanu.

𝙈é𝙙𝙞𝙖 𝙈𝘾𝙄