𝘿í𝙡𝙞, 05 𝙈𝙖𝙞𝙤 2026 – Ministériu Komérsiu no Indústria (MCI), liuhosi Diretor Jerál Indústria, Sr. Jorge Ferreira, hamutuk ho Diretór Nasional Mikro, Pequena no Média Empresa, Sr. Reinaldo Borges, halo vizita ba Kompania Esmelia Unipessoal LDA, ne’ebé fó prioridade ba atividade exportasaun produtu agríkola ba merkadu internasionál, inklui ba China no Indonésia.

Objetivu hosi vizita ne’e, atu fó orientasaun kona-ba prosesu lisensa setoriál no fasilita tratamentu sertifikadu de origem, hodi apoiu atividade exportasaun. Durante enkontru, parte MCI halo komunikasaun direta ho lideransa empresa atu hato’o klarifikasaun kona-ba importânsia hakbesik an ba ministériu hodi trata dokumentasaun relevante.

Empresa Esmelia Unipessoal LDA hatudu katak sira halo ona exportasaun ba produtu hanesan kafe, nu’u, tali-musan no maek. Iha oportunidade ne’e, MCI fó hanoin no orientasaun atu empresa trata sertifikadu de origem, tanba dokumentu ne’e importante atu evita difikuldade bainhira halo exportasaun ba merkadu internasionál.

Aleinde ne’e, MCI apresia kontribuisaun empresa ne’e ba ekonomia nasional, liu husi kria oportunidade servisu ba ema hamutuk 20. Setór privadu konsidera nu’udar parseiru importante ba governu iha dezenvolvimentu ekonomiku Timor-Leste.

Media MCI