Dili, 06 maiu 2026- Sua Exelénsia Ministra Edukasaun Dra. Dulce de Jesus Soares ho delegasaun sira husi Comunidade dos Paises da Língua Portuguesa (CPLP) hala'o vizita no tau aifunan ba eroi no eroina sira iha semitériu Santa Cruz, Dili.

Iha Vizita husi Sua Exelénsia Ministra Edukasaun Dra. Dulce de Jesus Soares ho delegasaun ne'e simu direta husi Prezidente no Estrutura Comité 12 de Novembro nian nomós familia husi eroi no eroina sira ne'ebé uluk mate iha masakre Santa Cruz iha loron 12 fulan novembru tinan 1991.

Nune'e hafoin vizita, Sua Exelénsia Ministra Edukasaun Dra. Dulce de Jesus Soares hatete, masakre Santa Cruz iha tinan 1991, loron trájiku ida ne’ebe joven timor-oan atus resin lakon sira nia vida, bainhira halo protestu pasífiku ba sira nia direitu ba autodeterminasaun no sai mós símbolu maka’as ida ba rekuperasaun, reziliénsia no korajen inspiradora husi povu ida ne’ebe mak iha tempu naruk moris iha sofrimentu nia laran hodi ikus hetan independénsia.

" Ha'u agardese tebes ho prezensa prezidente ho estrutura no familia bo’ot Comité 12 de Novembru nian hodi simu delegasaun sira husi CPLP, atu bele fó lembra ita-nia istoria pasadu nian ba delegasaun sira. Ida ne'e hanesan momentu importante ida atu bele fó informasaun lolos kona-ba masakre santa kruz nian iha tinan 1991 liubá,” Ministra akresenta.

Enkuantu Prezidente Komité 12 Novembru Sr. Gregorio Sandanha “Mouris” akresenta, importante teb-tebes Ministériu Edukasaun nia funsionamentu liga ho istoria sira atu nune'e bele kontinua existe historia sira konaba luta rai ne’e nian ba libertasaun da patria husi jerasaun ba jerasaun.

"Hau husu Ministériu Edukasaun atu nafatin haklaken ita-nia istoria sira liuliu ba ita-nia estudante sira tanba ne'e hanesan memória importante ida atu bele konta husi jerasaun ba jerasaun,” tenik Prezidente Comité 12 Novembru.

#EliasdaCosta

#MédiaME