Dili, 06 maiu 2026 - Sua Exelénsia Ministra Edukasaun Dra. Dulce de Jesus Soares hala'o Sorumutu ho Minister-Counsellor (Development) ba Indonézia, Timor-Leste, no ASEAN iha Missaun Reinu Unidu nian Sr.r. Peter Rajadiston hodi ko'alia kona-ba kooperasaun no apoiu sira ba Ministériu Edukasaun, iha sala VIP Ministériu Edukasaun Vila-Verde.

Hafoin remata sorumutu, Sua Exelénsia Ministra Edukasaun Dra.Dulce de Jesus Soares informa, ohin sira mai atu esplora hodi apoiu Timor-Leste liuliu foku ba aprendizajen baze ne'ebé sei haree liu ensinu báziku.

" Bainhira sira esplora, Ministériu Edukasaun sei tur hamutuk sira atu nune'e apoiu sira ne'ebé fó mai ministériu edukasaun iha aliñamentu ho programa prioridade ne'ebé importante iha literásia no numerasia atu reforsa estudante sira husi klase 1 to'o 6 ensinu báziku", Ministra Esplika.

Governante ne'e aprofunda, atu programa ne'e bele la'o di'ak sira mós sei fó apoia ba formasaun profesór sira-nian hodi reforsa tan INFORDEPE.

Iha sorin seluk, Minister-Counsellor (Development) ba Indonézia, Timor-Leste, no ASEAN iha Missaun Reinu Unidu nian Sr.r. Peter Rajadiston akresenta, Reinu Unidu iha komitmen bo'ot atu apoiu setór edukasaun iha Timor-Leste liuliu haree ba literásia no numerasia husi estudante ensinu báziku.

" Ami mós sei halo kapasitasaun liuhusi formasaun ba profesór sira atu nune'e bele garante kualidade edukasaun tanba wainhira profesór sira ho kualidade sei garante estudante sira nia futuru ho di'ak liu," Tenik Sr. Peter.

#EliasdaCosta

#MédiaME