𝐃í𝐥𝐢, 𝟎𝟕 𝐌𝐚𝐢𝐮 𝟐𝟎𝟐𝟔 –Steering Comite ba Portál Informasaun Komérsiu Timor-Leste (TLTIP), lidera hosi Ministériu Komérsiu no Indústria (MCI) ho parseria Banku Mundiál, realiza sorumutu iha Banku Mundial, hodi diskute dezenvolvimentu futuru portal nian. Enkontru ne’e subliña papél TLTIP hanesan instrumentu vital atu apoia integrasaun Timor-Leste iha kuadru Organizasaun Mundiál Komérsiu (OMK) no ASEAN.

Iha diskursu abertura, Diretor Jerál Komérsiu Elias de Jesus fó enfase kona-ba importánsia formasaun kapasidade atu garante sustentabilidade portal nian. Nia hatete katak prioridade formasaun inklui:

• Jestaun Administrativu ba ajénsia sira, atu bele atualiza dokumentu legál no prosedimentu komérsiu ho independente.

• Programa Formasaun Específiku atu ajuda negósiu no parte interesada sira navega portál ho efetivu, liuhusi “guided journeys” ne’ebé fó asesu klaru ba lei komérsiu, alfándega, lisensiamentu, tarifa no regra importasaun-esportasaun.

“TLTIP sentraliza ona regulamentu liu 165 hosi ajénsia oioin iha baze-dadus ida de’it, ne’ebé bele buka online. Inisiativa ne’e kontribui ba redusaun tempu apuramentu importasaun no esportasaun tuir 20%, no fó seguransa ba investidór sira katak Timor-Leste halo alinamentu ho padrãu internasionál” 𝘩𝘢𝘵𝘦𝘵𝘦𝘯 𝘋𝘑 𝘒𝘰𝘮é𝘳𝘴𝘪𝘶

ASEAN nia prinsípiu ekonómiku fó prioridade ba transparénsia no previzibilidade iha prosedimentu komérsiu. Liuhusi TLTIP, negosiante sira, investidór sira, no ajénsia governu sira bele asesu informasaun komérsiu iha plataforma dijitál ida ne’e, ne’ebé fó klaridade no fasilitasaun ba transasaun internasionál.

Komité Diretivu subliña katak TLTIP la’ós de’it website ida, maibé hanesan koluna vertebra dijitál ba transformasaun ekonómika Timor-Leste. Faze kooperasaun tuir mai ho Banku Mundiál sei foka ba kapasidade institusionál no treinu tekniku, atu garante portal nia vitalidade hanesan motor ba fasilitasaun komérsiu, kompetitividade no kresimentu sustentavel.

Enkontru ne’e konklui ho apresiasaun ba Banku Mundiál no Komité Diretivu TIP, hodi subliña parseria ne’ebé kontinua fó impaktu pozitivu ba dezenvolvimentu komérsiu Timor-Leste.

𝗕𝗲𝗹𝗲 𝗞𝗹𝗶𝗸 𝗟𝗶𝗻𝗸 𝗻𝗲’𝗲 𝗵𝗼𝗱𝗶 𝗮𝘀𝗲𝘀𝘂 𝗯𝗮 𝗽𝗼𝗿𝘁𝗮𝗹 𝗶𝗻𝗳𝗼𝗿𝗺𝗮𝘀𝗮𝘂𝗻:

https://www.tip.mci.gov.tl/en-gb

𝙈é𝙙𝙞𝙖 𝙈𝘾𝙄

See less