Dili, 08 Maiu 2026

Ministru Transportes no Komunikasaun, Eng.Miguel Marques Gonçalves Manetelu simu ho laran ksolok vizita kortézia husi Embaixadora bá Asuntu Sibernétiku no Teknolojia Krítiku, Jessica Hunter iha Gabine Ministru Kaikoli Dili.

Iha vizita ne’e Embaixadora Jessica Hunter akompaña husi Embaixadora Austrália iha Timor-Leste, Caitlin Wilson no kontinua ho enkontru entre parte rua.

Iha enkontru ne’e Ministrru Manetelu subliña vizita ne’e Hanesan honra boot ida bá Ministériu hodi hatudu governu austrália nia amizade no kooperasaun ne’ebé forte iha área dezenvolvimentu dijitál, komunikasaun no seguransa sibernétika.

“Ita-nia prezensa hatudu amizade no kooperasaun ne'ebé forte entre Timor-Leste no Austrália, liuliu iha área dezenvolvimentu dijitál, komunikasaun no seguransa sibernétika, Ho apoiu Austrália nian, ami konekta ona Kabu Submariñu Fibra Ótika bá VOCUS nia Kabu, tanba ne'e ami hanoin Seguransa sibernétika tenke sai ona prioridade importante bá nasaun hotu-hotu, liu-liu bainhira ita kontinua promove transformasaun dijitál no reforsa konektividade nasionál” Ministru Manetelu subliña.

Ministru Manetelu afirma Governu kompriende katak importante tebes atu hari'i infraestrutura dijitál no sistema komunikasaun ne'ebé seguru, forte no bele fiar.

“Ami valoriza teb-tebes esperiénsia no lideransa Austrália nian iha área cyber security no governasaun dijitál, ami fiar katak iha oportunidade barak atu hametin kooperasaun, fahe koñesimentu no dezenvolve kapasidade entre nasaun rua ne'e” Ministru Manetelu afirma.

Lori governu Timor-Leste nia naran Ministru Manetelu agradese bá apoiu no parséria husi Austrália ne'ebé ho seriedade kontínua atu ajuda Timor-Leste reforsa kapasidade institusionál no téknika.

Governante ne’e esprera katak liuhusi diskusaun ne’e bele hametin liu tan kolaborasaun no loke oportunidade foun bá kooperasaun iha futuru iha área seguransa sibernétika, telekomunikasaun, konektividade dijitál no setór sira seluk.

https://sdi.gov.tl/ministerio/presrealease/create

𝐌𝐞́𝐝𝐢𝐚 𝐌𝐓𝐊